Illersornissaqarfik Kangerlussuup ingerlanneranut akiliisussaasoq
Naalakkersuisut danskillu naalagaaffiata Kangerlussuarmi mittarfiup Nuummi, Ilulissani Qaqortumilu mittarfiit nutaat naatsorsuutigisatut 2023-p kingorna piareerpata ataannarnissaanut tunngaviusumik isumaqatigiissut ullumi atsiorpaat.
Kangerlussuarmi mittarfiup ingerlanneqarnera Illersornissaqarfiup akilissagaa Naalakkersuisut Karl Frederik Danielsenip Ane Lone Baggerillu qasseeriarlutik oqaatigaat, tamannali tunngaviusumik isumaqatigiissummi tusagassiortunik katersortitsinermi atsiorneqartumi allassimanngilaq.
Isumaqatigiissutilli saniatigut isumaqatigiissummi allami mittarfiup ingerlatiinnarnissaanut aserfallatsaaliornissaanullu Illersornissaqarfik akiliissasoq isumaqatigiissutaavoq.
Attaveqatigiinnermut Naalakkersuisoq, Karl Frederik Danielsen KNR-imut tusagassiortunik katersortitsinerup kingorna taama oqaluttuarpoq.
Illersornissaqarfiup akiliinissaa isumaqatigiissummi ilaanngitsoq qanoq taamaannerarsinnaaviuk?
- Suliap nanginnerani saqqummiuttagassatsinni tamanna takusinnaalissavat. Illersornissaqarfiup akiliinissaanik neriorsorneqarpugut, Karl Frederik Danielsen oqarpoq.
Taava atsiugaareertumik illersornissaqarfiup akiliinissaanik isumaqatigiissuterpoq, suli saqqummiunneqanngiinnartumik?
- Aap, Karl Frederik Danielsen oqarpoq.
Mittarfimmik ingerlatsinerup aningaasartalernissaa, koruuninik millioninik hunnorujulikkaanik naleqartussaq, qitiuvoq.
Mittarfiup maanna annertussusaatut iluseqartillugu ataannarnissaa 700 millionit koruunit tikillugit akeqassasoq, 2018-imi nalunaarummi missiliutigineqarpoq.
Mittarfiulli 2023-p kingorna ataannarnissaata qanoq akeqarnissaanik suleqatigiissitat maanna misissuileruttortut, Karl Frederik Danielsen oqarpoq.
Karl Frederik Danielsenip Mittarfeqarfiit Kangerlussuarmi mittarfimmik piginnittuuginnassasut erseqqissaatigaa, Illersornissaqarfiulli mittarfimmik ingerlatsisuunerminut akiliutitut taanna sakkutooqarnermut atorsinnaassavaa.