Mittarfeqarfiit namminersortunngorsarneqassapput
![](/sites/default/files/styles/image_934x467/public/article_images/jens_b_taler_630_9.jpg?itok=aSkQ9y7S)
Tamanna tunngavigalugu Mittarfeqarfiit aaqqissuussaanerata allanngortinneqarnissaa Naalakkersuisunit suliniutigineqaleruttorpoq, namminersorlutik suliffiutillit Mittarfeqarfinnut aningaasaleeqataallutik ingerlatsiqataalersinnaanerat anguniarlugu. Taama nalunaarpoq Ineqarnermut, Attaveqarnermut Angallannermullu Naalakkersuisoq, Jens B. Frederiksen.
- Mittarfiit ilaat aningaasanik kaaviiaartitaqarnisaaminnut periarfissaqarpianngillat ilaalli periarfissagissaarnerullutik. Tassalu tamanna politikkikkut aaqqiiffiginiagassarput. Tamannali pissanngilaq inuiaqatigiit politikerillu oqartussaaqataanerat qulaatiinnarlugu, Ineqarnermut, Attaveqarnermut Angallannermullu Naalakkersuisoq, Jens B. Frederiksen oqarpoq.
Air Greenland timmisartuutiminik taarsersuilluni aallarteruttorpoq, Dash 7-nit nutaanngilisut nutaanik Dash 8-inik taarsersorneqarmata. Taakkulu timmisartut nutaat mittarfinnik takinernik pisariaqartitsipput, tassa mittarfiit 1.050 meterisut takitigisut minnerpaamik pisariaqartillugit. Taamaalilluni namminersorlutik suliffeqarfiutillit suleqataallutillu aningaasalersueqataanissaminnut periarfissarilissavaat mittarfiit amerlanerit sinerissatsinniittut tallisarneqarnissaannut.
- Mittarfeqarfiit aaqqissuuteqqinnissaat ukiarli piareersarlugu aallartipparput. Sulili aalajangiunneqanngilaq taamaattoqassanersoq. Takorluugarpulli unaavoq; Mittarfeqarfiit aktieselskabinngortikkutsigit namminersortut aningaasaliisinnaanngornissaat. Taamaaliornikkut mittarfiit ilaat tallineqarsinnaanngussapput imaluunniit nutaarluinnarnik miittarfiliortoqarsinnaanngussalluni. Taamaalilluni namminersortut peqataatsinneqarsinnaanngussagaluarput, Ineqarnermut, Attaveqarnermut Angallannermullu Naalakkersuisoq, Jens B. Frederiksen taama oqarpoq.
Mittarfeqarfiit pisortaa, Niels Kreutzmann oqaaseqartissimasinnaanngilarput.