Missingersuutinik ingerlatseriaaseq Kommuneqarfik Sermersuumi miliuuninik pingasunik kisitsisitalinnik amigartoortitsisoq

Kommuneqarfik Sermersuumi 814 miliuunit koruuninik amigartooruteqarnermut Nuuk City Developmentimik isumaginnilerneq peqqutaavoq. Professori naapertorlugu pappialatigut amigartooruteqarneq missingersuutinik ingerlatsinermut tunngatillugu silatusaarneruvoq.

Allattoq Martin Pedersen

marsip 24-at 2023 12:01

Nutserisoq Sussi Jensen

814 miliuunit koruunit.

Tassa, marlunngormat politikerinut saqqummiunneqartumi, Kommuneqarfik Sermersuup 2022-mut ukiumut nalunaarusiaani amigartoorutai taama annertutigaat. Amigartoorutit annertussusaat nalinginnaanngitsoq.

Tamannali nassuiaatissartaqarpoq.

2022-mut ukiumut nalunaarusiami amigartoorutit amerlasuut kommunip karsimiit 1 milliard koruunit sinnerlugit tigusinnarlugit Sanaartugassanut Iluarsaagassanullu Aningaasaateqarfimmut nuussineraninngaanneerpoq. Tamanna Nuuk City Developmentip suliaanik nangitsinissamut pigisaanillu nalilinnik piginnilernissamut aalajangernermik tunngaveqarpoq.

Nuummi illoqarfiup piffissami sivisuumi ineriartortinneqarnissaa pissutigalugu ukiut arfinillit matuma siorna pilersinneqarpoq.

NCD-p inissianik, illunik aningaasaliiffissatullu suliniutinik ineriartortitsinissaq, sanaartornissaq ingerlatsinissarlu siunertarai. Nuummi atuarfimmik, ulluunerani paaqqinniffinnik qatserisarfimmillu nutamik pilersitsinissaq suliassanut ilaatigut ilaapput. Tamatuma saniatigut NCD illoqarfiup ilaanut Siorarsiorfimmut pilersaarummik ingerlatsinissaq pissutigalugit pilersinneqarpoq.

NCD-lli siulersuisuisa pisortaaneq pisortallu tulliata suleqatiginerat unitsinneqartoq maajip ulluisa aqqaneq-aappaanni nalunaarutigaat.

NCD-p kommunip inissiaatileqatigiiffianut Iserimut kattunneqarnissaa taamanikkut borgmesterip Charlotte Ludvigsenip tamatuma kingorna siunnersuutigaa. Kommunip NCD-p atuarfimmik sanaartornermik ulluuneranilu paaqqinniffiit pillugit suliassat nammineq aamma tigussavai.

Borgmesterimit siunnersuut kukkunersiuisut kommunip inissiaqarnermut atatillugu suliaqarneranik allaffissorneranillu nalunaarusiaata saqqummersinneqarnerata nalaani siunnersuutigineqarpoq, nalunaarusiami NCD aamma isornartorsiorneqarpoq.

Nalunaarusiami ulluunerani neqeroorutinik atulereersunik suliniutinillu piviusunngortinneqangajalersunik attartornissamik isumaqatigiissuteqartoqarsimaneranut takussutissaqanngitsoq nalunaarusiami erserpoq. Matumani Nuummi atuarfiup nutaap sanaartornera ilaatigut pineqarpoq. Tassunga aningaasaliinerit sanaartortoqaleruttornerani aamma inissinneqarsimanngillat.

Decembarimi 2022 Sermersuup NCD-p sanaartugassatut suliniutaanik nangitsinissaminut 1,25 milliardit koruuninik atornissaa Naalakkersuisunit akuersissutigineqarpoq.

NCD-p kommunip inissiaatileqatigiiffianut Iserimut kattunneqarnissaa aningaasaqarnermut ataatsimiititaliap ukioq manna januaarimi akueraa.

Allisiguk

Tamassumalu tamakkerlugu isiginninnissaq ajornannginnerulersippaa, Aalborg Universitetimi aningaasaqarnermi aqutsinermut professori, Per Nikolaj Bukh, taama oqarpoq.

- Assut ajornannginnerulersippaa, aamma sunik pisoqarneranik politikerit paasinninnissaannut, pissutigalugu isertitanut atatillugu aningaasartuutit suunersut ilisimaneqarmata. Taamaasillutik aningaasartuutit akulerunngillat, taanna oqarpoq.

Missingersuutinut inatsimmi nutaami aalajangersagaq atorneqarsimavoq, tamannalu siunissami aningaasartuutissat sanaartornerup iluanut inissinneqarsinnaaneranik isumaqarpoq, taakku ukiumut 2022-mut aningaasartuutinngortillugit. Aningaasat taakkua atorneqavinngillat, kingusinnerusukkulli atorneqarumaarput.

Tassa, tamanna naatsorsuusiornermut tunngassuteqarluinnarpoq.

Inuttut nammineq missingersuutinut kontoqarnermut assingusoq

Missingersuutinik ingerlatsineq tamanna inuttut nammineq carportitaarnissamut aneersuaartarfittaarnissamulluunniit missingersuutinut kontotaarnermut assingulaarpoq.

- Tamassumunnga missingersuuteqarnermut aamma immikkut aningaasaqartinneqarnera pitsaasuuvoq, taamaasilluni aningaasartuutissat kontomiit nuunneqarsinnaapput aamma taamaalinikkut carportitaarnissamut aningaasat siunertarinngisaannut soorlu sulinngiffeqarnermut atorneqartoornerattuulli pinaveersaarneqassaaq, Per Nikolaj Bukh oqarpoq.

Aamma atuaruk Kommune nunatsinni meeqqat atuarfiata anginerpaat sanaartorneranik iluatsitsiniarluni milliardinik atussasoq

Tassa imaappoq aningaasat sumut atorneqarnissaat nalunngikkaanni tamarmik akulerutsillugit pigineqassanngillat.

”Ajornaatsumik aaqqissuussineq” Per Nikolaj Bukhip taama taavaa.

Ingerlatsineq silatusaarnerusoq

Ingerlatsinerli tamanna nalinginnaasuunngilaq, inatsisip siulia naapertorlugu taamatut missingersuusiortoqarsinnaasimanngilaq. Inatsisilli nutaap kingorna tamanna periarfissanngorsimavoq, Per Nikolaj Bukhilu isumaqarpoq tamanna eqqarsaatigilluagaasoq, taamaanngikkaluarpammi katiternerlukkanik kinguneqarsinnaammat, soorlu naatsorsuutit uku nalinginnaasumik isikkullit naatsorsuusiassat allat annertunerujummik amigartooruteqartussatut isikkoqarlutik.

- Tamanna ima isumaqassagaluarpoq, kommunip missingersuutit inerneri assigiississappagit piffiit ilaanni pisortat aningaasalersuinerat sipaarniarfigineqarsimassagaluarpoq, Per Nikolaj Bukh taama oqarpoq.

Taamaattumik taama pisoqannginnissaanut kommunip periusia una iluaqutaanerpaatut Perip isigaa, periutsip aamma politikerinik innuttaasunillu malinnaatitsinissamut ajornannginnerulersitsivoq.