Nakorsaanerup napparsimasunik nalunaaruteqarnerit tunillatsissimasut amerlassusaannik paasiniaanermi atussagai
Nunatsinni covid-19-imik tunillatsissimasut qanoq amerlatiginerat maanna ilisimaneqanngilaq. Tamanna misissueriaatsip sapaatip akunnerata siuliani atulersinneqartup kinguneraa.
Napparsimaruluttut maanna kisimik PCR-imik misissortissinnaapput. Allat sinneri peqqisseqqinnissami tungaanut angerlarsimaannassapput – aammalu imminnut peqqissisutut nalunaarutigisassallutik. Misissuisarfiit napparsimmaviillu tunillatsissimasorpassuit pissutigalugit ilungersornerat pissutigalugu taama periuseqartoqalerpoq.
Taamaalilluni nunatsinni coronamik tuniluuttoqarnerani kikkut tamarmik misissornissaat sakkussaajunnaarpoq. Inuillu PCR-imik misissortinngikkunik, napparsimavimmiinngikkunik nakorsiartarfimmiinngikkunillu tunillatsissimasut qanoq amerlatiginerat ilisimaneqarnavianngilaq. Naammi angerlarsimallutit vatpindimik sorlummut isertitsinikkut ilitsersuutinik atugaqareerlutit tunillatsissimanerit iggavimmi nerriviusap qaani uppernarsarneqarsinnaagaluartoq tamanna arlaanni nalunaarsorneqartanngilaq. Taamaammat Naalakkersuisut Nakorsaaneqarfillu atortunik allanik atuilerput.
AAMMA ATUARUK Namminersorlutik Oqartussat misissuutinik akeqanngitsunik nassiussisoq: Usuup puuisa sanianut aaneqarsinnaapput
Namminersorlutik Oqartussat suliffeqarfiutaannit Sulisitsisuniillu Namminersorlutik Oqartussanut Nakorsaaneqarfimmullu corona pissutigalugu qassinik napparsimasortaqarneq sapaatip akunneranut marloriarluni nalunaarutigineqartalissaaq.
Misissueriaaseq allanngortinneqarpoq, taamaalilluni ikittuinnaat, tassa covid-imik tunillatsinnermi napparsimarululersinnaasut kisimik PCR-imik misissortissinnaalerlutik:
Inuit coronamik napparsimarululersinnaasut aamma angalasussat coronapasimik atuisussat misissortissinnaapput.
Allat sinneri angerlarsimaffimminni imminnut misissorsinnaapput aamma/ imaluunniit peqqisseqqinnissartik utaqqissavaat.
Peqqisseqqittutut nalunaarutiginissaq, angerlarsimaffimmi misissornissaq kiisalu coronamik tunillatsissimaneq nuannertut nuallunnertullu kisimi misigisimanarpat napparsimmavimmut nakorsamulluunniit attaveqarani angerlarsimaffimmi mattusimaannarnissaq inuit namminneq akisussaaffiginerulerpaat.
Tamanna misissuisarfiit napparsimmaviillu malinnaasinnaajunnaarnerannik pissuteqarpoq.
Neriniartarfiit imerniartarfiillu januaaripo ulluisa 25-ata tungaanut unnukkut quliniit ullaakkut tallimat tungaanut matoqqasassapput.
- Tuniluunnerup qanoq annertutiginerata paasiniarnerani taamaaliorpugut, Corona pillugu aqutsisoqarfimmi siulittaasoq, Hans-Peder Barlach oqarpoq.
- Napparsimasut nalunaaruteqarnerit qanoq amerlatigisut napparsimanerannut takussutissiissapput. Coronamik tunillatsissimasut qanoq amerlatiginerat taamaalilluni takussuserneqarsinnaalluni.
Tunillatsissimasut qanoq amerlatigeqqissaarneri pingaarnerunngitsoq
Nakorsaaneqarfiup kommunit toqqaannartumik atassuteqarfigai, taakkunannga tuniluunnerup qanoq annertutiginera nalunaarutigineqartarpoq.
Tamanna qanoq eqqortigisumik takussutissiiva?
- Eqqoqqissaartumik takussutissiinngilaq, nakorsaaneq, Henrik L. Hansen corona pillugu aamma nammineq napparsimasoq oqarpoq,
- Nunatsinni tuniluunnerup qanoq ingerlaarnerata takusinnaanissaa pingaarneruvoq. Annikitsortat paasissutissartaat soqutiginngilagut.
Hans-Peder Barlach ilassusiivoq:
- Nunatsinni tuniluunnerup sumiinneranut takussutissiissaaq. Tamanna ataatsimiit ataatsimut sanilliunneqarsinnaanngilaq. Ullormi ataatsimi napparsimasut 150-iuppata ullullu appassaani 200-juullutik taava tamanna tuniluunnerup ineriartorneranut takussutissiissaaq. Imaluunniit tuniluukkunnaariartortoqarnersoq imaluuniit annikinnerulernersoq. Kisitsisit eqqorluaqqissaarnissaat pingaarnerpaanngilaq. Kisianni ineriartorneranut ataatsimut takunnissinnaanissarput pingaaruteqarpoq.
Ataatsimut isiginnilersinnaanissamut atatillugu qanoq pitsaassava?
- Tuniluunnerup ineriartornera takusinnaassagatsigu pitsaassaaq. Inuiaqatigiinni pingaaruteqartunik assersuutigalugu peqqinnissaqarfimmi sulisoqaannarnissaa anguniakkatsinni pingaarneruvoq.
PCR-imik misissukkat affaat sinnerlugit tunillatsissimasut
Dagens smittetal er 148 nye coronasmittede. De er fundet på 251 PCR-test.
Coronamik tunillatsissimasut nutaat ullumikkut 148-pput – misissorneqartut 59 procentii tunillatsissimasuupput.
AAMMA ATUARUK Misissuisarfiit napparsimmaviillu ilungersungaatsiarmata kikkunnut tamanut PCR-imik misissuisoqartarunnaartoq
Nunatsinni tunillatsissimasut januaarimi aatsaat taama amerlatigipput: Januaarip ulluisa qulinganni covid-19-imik tunillatsissimasut 3.000-ngajaapput.
Naalakkersuisut oqarnerat naapertorlugu tunillatsissimasut amerliartuinnarnerat pissutigalugu peqqinnissaqarfik ilungersulermat misissuinermi periuseq nutaaq ulloq taanna atulersinneqarpoq.
Nakorsaanerup Henrik L. Hansenip oqarnera naapertorlugu tunillatsissimasut sapaatit akunnialui qaangiuppata amerlanerpaaffissaminniilissapput
