Misissuineq tupaallannartoq: Siumut IA-mit annerpaavoq
KNR-illu misissuinera naapertuutissappat Aleqa Hammond Naalakkersuisut siulittaasunngorsinnaavoq. Suleqatissatullu Partii Inuit amerlanerussuteqarlutik naalakkersuisooqatigiilersinnaapput. Partiit taakkua marluullutik smsikkut 52,6 procentinik taaguunneqarmata.
Misissuinermi periuseq atorneqartoq peqataarusuttunut taamaallaat taasisitsinerummat tamanna erseqqissaatigineqarpoq. Taamaakkaluartoq tamanna Kuupimmut eqqarsaatissiissutaasinnaavoq. Tamatumali saniatigut HS Analysep Facebookikkullu Sermitsiap taasisitsisarnerini IA-kkut amerlanerussuteqartutut inissisimasarsimapput.
Qinersisartut taasisitsinermi peqataasut 1.817-iupput, tassani qinersisinnaasuni 4,5 %-isuneersuullutik. Siumut 45,2 %-nit taaneqartoq. Inuit Ataqatigiit partiini annerni tullersortaasoq 32,3 %-nik taaneqartoq, Demokraatit 7,9 %-inik, Partii Inuit 7,4 %-nik kiisalu Atassut Inatsisartuni partiini minnerpaatut inissittussanngoriaannaasoq 6,3 %-nik taasiseqarpoq. Kattusseqatigiit partiiat 0,9 %-nik taaguunneqartoq.
KNR-TV-kkut toqqaannartumik aallakaatinneqartumi inersuarmi najuuttuni Siumukkunnut IA-kkunnullu illersuisorpassuit najuupput, marlunngorninngoreerpalli aatsaat nalunaallissaaq kikkut nunarput siuttuuffigilissaneraat.
