MIO-mit nersornaaserneqartoq meeqqanut toqqissisimanermik pilersitsisartoq
MIO-p 2023-mi nersornaataa Qaanaameersumut piumassuseqarluartumut, Ane Qujaukitsumut tunniunneqarpoq.
Taanna ukiorpassuarni nammineq kajumissutsiminik meeqqanut inuusuttunullu sunngiffimmi pitsaasunik susassaqartitsiniartarpoq. Taakku imminnut naleqartinneranik pitsanngorsaataasumik misigisaqartinneqarnissaat siunertaavoq.
Ane Qujaukitsup MIO-mit nersornaaserneqarnini tulluusimaarutigaa.
- Nersornaaserneqarnera assut killitsissutigaara. Meeqqat inuusuttullu toqqissisimanartunik avatangiiseqarlutik pitsaasunik misigisaqarnissamut periarfissaqarpallaanngitsut sullittarpakka.
- Nersornaaserneqarumallunga taamaaliorneq ajorpunga, namminerli kajumissutsimik suliaqartarnera uannut isumaqaqimmat MIO-mit nersornaaserneqarnera assut nuannerpoq
Ane Qujaukitsup Qaanaami meeqqat inuusuttullu pinngortitamut ilagalugit unnuiartoqatigalugit eqalunniaqatigisarpai. Aamma crossfitimi timigissarnermillu sungiusaanissaq neqeroorutigisarpaa, taamaalillutik timiminnik atuisinnaallutik.
20.000 koruunit
MIO-mit nersornaat Naalagaaffiit Peqatigiit meeqqat pillugit isumaqatigiissutaata ulluani novembarip 20-ani ukiut tamaasa tunniunneqartarpoq.
Nersornaat inummut, peqatigiiffimmut suleqatigiinnulluunniit meeqqanut immikkut ittumik suliniuteqarsimasunut tunniunneqartarpoq. MIO-mit nersornaat meeqqat pisinnaatitaaffiinik nersortariaqartumik suliaqarluarsimanermut ajunngitsuliorneruvoq.
Nersornaasiineq 20.000 koruuninik aningaasartaqarpoq.
- MIO-mut assut ataqqinaataavoq arnaq meeqqat inuusuttullu nunaqqatini pillugit sunniuteqarusulluni qasusuilluni suliaqartartoq 2023-imi MIO-mit nersornaasissallugu. Meeqqat inuusuttullu pitsaasunik toqqissisimanartunillu sunngiffimmi neqerooruteqarfigineqarnissaat assut uummateqarfigaa, aamma meeqqat pisinnaatitaaffiisa eqqortinneqarnissaasa siuarsarnissaat assut pingaartippaa, Meeqqat illersuisuat, Aviâja Egede Lynge tusagassiuutinut nalunaarummi oqarpoq.
