Imminut toqunnissamik pinaveeersaartitsinermik sulialik MIO-mit nersornaaserneqartoq
Ilulissaneersoq, Lars Møller, imminut toqussimasunik annaasarpassuaqarpoq. Inuusuttuulluni angutaa imminut toquppoq, ikinngutaalu ukiuni kingullerni aamma imminut toquttut arlaliupput.
Lars Møller imminut toqunnissamik pinaveersaartitsinermik suliaqarnini pillugu MIO-p ukiukkuutaarlugu nersornaasiuttakkaminik ullumi sisamanngornermi tunivaa.
Meeqqat pisinnaatitaaffii pillugit sullissivik, MIO, tusagassiuutinut taama nalunaarpoq.
Ikiortariaqarpit?
Imminut toqunnissamik eqqarsaateqaruit kisimiittutulluunniit misigiguit, Tusaanngamut 801180-imut sianerlutit 1899-imulluunniit sms-erlutit saaffiginnissinnaavutit.
Tusaanngamut sianerneq sms-ernerluunniit akeqanngilaq, kinaanerlu taasariaqarani.
Tusaannga pillugu uani paasisaqarnerusinnaavutit.
- Taamaalinerani isummersorama, uanga sapinngikkuma, taava allat aamma sakkussaannik tunisinnaassallugit, inuunertik saperunnaassallugu, Lars Møller oqartoq tusagassiuutinut nalunaarummi allaqqavoq.
Taanna 35-nik ukioqarpoq Ilulissanilu ilinniartitsisunngorniartuulluni. Ilinniartitsisunngorniartuunermi saniatigut imminut toqunnissamik pinaveersaartitsinermik suliaqarpoq.
Lars Møller MIO-lu Qamanimik taallugu suliniummi suleqatigiipput. Inuusuttut imminut toqunnissamik pinaveersaartitsinermi tunngasunik tassani innersuussuteqartarput.
AAMMA ATUARUK Inuusuttut pinaveersaartitsinissamut siunnersuutaat: Ikiorneqarnissaq sakkussallu ajornaannerusut
Aamma Avanaata Kommunialu imminut toqunnissamik pinaveersaartitsinermi assigiinngitsutigut suleqatigiipput.
- Takorluukkama annersaat ilaat tassaavoq, inuusuttut amerlanerujussuit imminut toqunnissamik pinaveersaartitsinissamik suliaqalernissaat. Illoqarfinni tikittakkatsinni, anguniagaraarput, uagutsitut eqqarsartunik, aamma uagutsinnut suleqataarusuttunik nassaassalluta, Lars Møller oqarpoq.
20.000 koruuninik aamma akissarsitinneqartoq
Nunatsinni 2021-mi imminut toquttut 49-pput, 2020-milu 41-llutik. Tassa imminut toquttut ukiuni kingullerni tallimani ikiliartoratik amerliartuaarusaarsimapput.
Siornalu imminut toqoriaraluarsimasutut nalunaarsorneqartut 90-iupput. Tassa imminut toqoriaraluarsimasut ukiuni kingullerni tallimani amerliartoratik ikiliartuaarsimapput.
2021-milu imminut toqunnissamik sioorasaarisimasutut nalunaarsorneqartut 1309-upput. Tassa 2017-imiilli amerleriangaatsiarsimapput, 2017-imimi imminut toqunnissamik sioorasaarisimasutut nalunaarsorneqartut 832-upput.
Kisitsisit qulaani saqqummiussat politiinut nalunaarutiginninnernik tunngaveqarput. Tassa taakku nalunaarsorneqarsimasunit amerlanerusut ilimagineqarpoq.
Tusarfik: Kalaallit Nunaanni Politiit ukiumoortumik 2021-mi nalunaarsugaat
Lars Møller MIO-p ukiukkuutaarlugu nersornaasiuttagaanik tunisinnaammagu, meeqqat pillugit oqaaseqartartuata Aviâja Egede Lyngep tulluusimaarutigaa.
- Isumassinarsimaqaaq Lars Qamani`mi iluarsartuullugu pilersaarusiami suleqatigissallugu. Ersareqaaq, suliarujussuaq unissananilu qunusuilluni meeqqanut inuusuttunullu allatut nutaanerusumillu iliuuseqarusussusiata iluaqutaanera.
- MIO`p ukiukkuutaarlugu nersornaasiuttagaa Larsip pingaarutilerujussuarmik suliaanut, imminut toqunnissamik pinaveersaartitsinermut suliaanut nersorinninneruvoq, inuusuttut siunissarissaarnerunissaannut aqqutissiuimmat, meeqqallu inussuttullu pisinnaatitaaffiisa siuarsarnissaannut iluaqutaasumik, Aviâja Egede Lynge oqarpoq.
AAMMA ATUARUK MIO: Periusissamik kinguartitsisneq taamaatitsinermiit pitsaaneruvoq
MIO-p ukiukkuutaarlugu nersornaasiuttagaa inummut peqatigiiffimmulluunniit meeqqat inuusuttullu pillugit immikkut sulialinnut Naalagaaffiit Peqatigiit meeqqat pisinnaatitaaffiinut novembarip 20-ani ullorititaannut tunngatillugu tunniunneqartarpoq.
MIO-p nersornaasiuttagaannik tunineqartoq tunineqartulluunniit aningaasaateqarfiup Nuna Fondenip aningaasaliiffigisaannik diplominnallutillu 20.000 koruuninnattarput.
Inuunermi nuannersut imminnut toqunnissamik pinaveersaartitsinermik suliaqarnermi salliutinnissaat, Lars Møllerip pingaartippaa. Taassuma inuit imminut toqunneq pillugu ammasumik oqaloqatigiittarnissaannik kajumissaarpai.