Ministeriunerup ataatsimeeqatiginerani nunanut allanut politikki sammineqartoq
Statsministeri Mette Frederiksen, Savalimmiormiut naalakkersuisuisa siulittaasuat Bárður á Steig Nielsen, naalakkersuisullu siulittaasuat Kim Kielsen, ministeriunerup allattoqarfiani ullumi marlunngornermi ataatsimiipput.
Naalakkersuisut tusagassiutinut taama nalunaaruteqarput.
Maannakkut pisut tamanut attuumassuteqartut ingammik nunat tamalaat akornannut tunngassuteqartut ataatsimiinnermi eqqartorneqarput.
AAMMA ATUARUK Venstrep Issittumut oqaaseqartartortaava: Issittoq eqqissisimanartuujunnaarpoq
Issittup Atlantikullu Avannaata nunanit tamalaanit soqutigineqaleraluttuinnarnerat pissutaalluni naalagaaffeqatigiinnerup iluani suleqatigiinnermut nutaamik isumaqalersitsisut, Mette Frederiksenip ataatsimeereernerup kingorna oqaatigaa:
- Nunarsuarmioqatigiit soqutiginninnerulersimanerat pissutigalugu oqaloqatigiittarnerput annertusartariaqarparput aammalu pitsaanerusumik Danmarkip, Savalimmiut Kalaallillu Nunaata akornatsinni siusinnerusumit suli pitsaanerusumik suleqatigeeriaaseqartariaqarpugut. Tamakku pissutigalugit ullumi ataatsimiikkatta nunanut allanut, Naalagaaffimmilu isumannaallisaanissamut illersorneqarnissamullu politikimut tunngassutillit eqqartorpagut, statsministeri Mette Frederiksen oqarpoq.
Savalimmiormiut kalaallillu politikeriisa nunanut allanut politikkimut sunniuteqarnerulernissaq piffissami sivisuumi kissaatigaat, Mette Frederiksenillu Savalimmiunut periarfittusiinerunissamut piareerluni novembarimi oqaatigaa.
Frederiksenip ministeriuninngornissaanut, folketingimut qinersisoqannginnerani KNR-imit apersorneqarluni sammisaq tamanna aamma iserfigaa. Tassanilu Kalaallit Nunaat Savalimmiullu nunanut allanut politikkiminnut aalajangiisinnaanerulernissaasa oqallisiginissaat piareersimaffigalugu oqaatigaa.
Kielsen: Naalakkkersuisut sunniuteqarluarnerussapput
Ataatsimiinneq ammasumik pitsaasumillu ingerlasoq, naalakkersuisut siulittaasuata Kim Kielsenip oqaatigaa:
- Ataatsimeeqatigiinnerput ammasuullunilu pitsaasumik ingerlavoq. Nunatta Issittumi Atlantikullu Avannaani qitiusumik inissisimaffeqarnera, ukiunilu makkunani naalagaaffiit pissaanilissuit nunanut allanut tunngassutilinni ingerlatsinerat pissutigalugu avaqqunneqarsinnaajunnaariartuinnarnerput eqqumaffigaarput, naalakkersuisut siulittaasuat Kim Kielsen oqarpoq.
AAMMA ATUARUK Ministeriunerup Trump ataatsimeeqatigileruniuk Kalaallit Nunaat ilaatigut oqaluuseriniarpaa
Tamakku isigalugit Naalagaaffeqatigiinnerup iluani Kalaallit Nunaat Issittorlu pillugit apeqqutinut aalajangigassanullu piviusumik avaqqunneqarsinnaanngitsumillu Naalakkersuisut inissisimaffeqarnissaat pingaaruteqarluinnartuusoq, naalakkersuisut siulittaasuata aamma oqaatigaa.
Savalimmiormiullu lagmandiat Bárður á Steig Nielsen isumaqataavoq:
- Naalagaaffeqatigiittut sulinerput Issittumi initoorujussuuvoq. Savalimmiut Atlantikup Avannaani illersornissaq eqqarsaatigalugu pilersaarusiortarnermi inissisimanerata nutaamik periarfissippaatigut. Tassunga atatillugu unammillernartut akisussaaffillu annertupput. Tamakku peqqissaarluinnartumik oqaloqatigiilluartarlutalu ingerlattariaqarpagut periarfissat saatsinniittut pitsaanerpaamik atorluassagutsigit, Savalimmiormiut naalakkersuisuisa siulittaasuat oqarpoq.