Minik Rosing: Urani pillugu taasisitsineq kingunerlutsitsisinnaavoq
- Aatsitassarsiornissamut isumaqatigiissutinut sinaakkutit allanngorteqattaarneri pitsaasuunngillat.
Taama oqarpoq Minik Rosing, Københavnip Ilisimatusarfiani geologimut professori, nalunaarusiamullu "Kalaallit Nunaannut ajunngitsussaq pillugu" januarimi saqqummersumut siulittaasoq.
Kalaallit Nunaanni uranimik piiaasinnaanermut apeqqut inunnut taasissutigitinneqarpat, Rosing naapertorlugu ajortumik kinguneqarsinnaavoq. Aatsitassarsiornissamummi aningaasaleerusussinnaasunik paatsiveerussaasinnaasoq, taanna oqarpoq.
- Ineriartortitsineq ukiorpassuarni ingerlanneqartarpoq, ingerlasoqarneranilu piumasaqaatit allanngortikkaanni piiaalernermi suut malittarisassat atuunnersut nalornisigineqalersarluni. Taamaattumik tamatumuuna eqqissisimatitsineq suliffeqarfinnut pitsaanerpaavoq.
Kalaallit Nunaata siunissaa pillugu nalunaarusiami atuarneqarsinnaavoq suliniutit angisuut 23-it ataatsikkut pisariaqartinneqartut, Kalaallit Nunaat aningaasaqarnikkut imminut napatissappat.
Kisianni - aningaasaliisussanut suli pingaaruteqassaaq aatsitassarsiorfik ataasiinnarluunniit - soorlu Kuannersuit - piviusunngunngittoorpat.
- Soorunami aatsitassat taamaallaat Kalaallit Nunaata aningaasaqarnikkut kiffaanngissuseqarnissaanut aqqutissatut isigigaanni, taava soqutaanngilaq. Kalaallit Nunaata kujataani sumiiffimmut pingaaruteqarsinnaavoq, soorunami aamma Kalaallit Nunaata aningaasaqarneranut pingaaruteqarsinnaalluni. Sunniuttaali annerpaaq tassaasinnaavoq kalerrisaarutitut sunniutaa, tassalu atugassarititaasut allanngoqattaarnerujussui. Taannartaalu ajornartorsiutaassangunarpoq.