Minik Rosing NunaMinerals pillugu: Pikkorilluinnarsimapput

Københavnip Universitetiani ujarassiooq professori Minik Rosing Nunamineralsip akiliisinnaajunnaarnermik pisortatigoortumik nalunaarutiginnittoqarnissaa uggornarivaa.

Allattoq Malu Pedersen, Laura Aggernæs

apriilip 22-at 2015 12:15

- Isumaqarpunga NunaMineralsimi sulisut pikkorilluinnarsimasut. Angusarissaarsimasutullu isigaakka. Oqareernittuullu NunaMineralsi suliffeqarfittut Kalaallit Nunaanni innuttaasut inuiaqatigiinnullu aatsitassarsiornerup tungaatigut susoqarneranik ilisimasaqartitsilersimasoq, Minik Rosing oqarpoq.

Aamma atuaruk NunaMineralsip pisortaa oqaaseqarumanngitsoq

Taamaattorli taamatut pisoqarnera nunatsinni aatsitassanik nutaanik nassaarniarnermut sunniuteqassanngitsoq, Minik Rosing isumaqarpoq.

- Isumaqarneruvunga, nunatsinni aatsitassarsiornermut atatillugu aningaasarsiornerup qanoq ittuuneranik aammalu suliat qanoq suliarineqartarnerannut tunngasunik ilisimasanik annaasaqarnermik kinguneqassasoq. Kisianni imaattariaqanngilaq siunissami ungasinnerusumi aatsitassarsiornerit ikinnerusut aallartissasut. Taamaaliartussanersoq naluara. Isumaqarpungali Kalaallit Nunaata tamatumani pigineqataassuseqannginera uggornarluinnartoq, Minik Rosing oqarpoq.Aammali NunaMineralsip akiliisinnaajunnaarnissaminik nalunaaruteqarnera aningaasaliisartut nunani allaneertut tunuarsimaalernissaannik kinguneqassangatinngilaa.

- Ilimangaara aatsitassarsiortut nunanit allaneersut apeqqutit allat apeqqutaatittaraat, Kalaallit Nunaat nammineq aatsitassarsiortitseqatigiiffeqarnersoq apeqqutaatinnagu.Tamanna ilimangaara, kisiat ilisimaqqisaanngilara, Minik Rosing oqarpoq.

Aamma atuaruk Patrick Newman: Nunaminerals matussappat kalaallinut annaasaqaataassaaq