COP21 Minik Rosing: Ataatsimeersuarnerup alaatsinaanneqarnera pingaarpoq
Ujarassiuutut professori Minik Rosing islandimiu eqqumiitsuliortoq Olafur Eliasson peqatigalugu Parisip qeqqani iluliaminernik nunatsinneersunik saqqummersitsiniartoq taama oqarpoq.
Nunat siuttuisa nunarsuup silaannaataa kissatsikkiartorneranik unikaallatsitsinissaq pillugu pittuisussamik ulluni aggersuni aqqaneq-marlunni isumaqatigiissuteqarniarneranni silap pissusia pillugu allatut aamma ilungersuuteqartoqarpoq.
Taakkununnga ilaavoq ujarassiuutut professori Minik Rosing, islandimiu eqqumiitsuliortoq Olafur Eliasson peqatigalugu iluliaminernik Nuup Kangerluaneersunik Parisip qeqqani illoqannginnersami saqqummersitsiniartoq.
Innuttaasunillu nalinginnaasunik paasititsiniaanissamik tamanna siunertaqarpoq:
- Isumaqarpunga inuppassuit pinngortitamut ima ungasitsigilersimasut allaat piviusoq takujuminaatsilersimallugu. Aamma isumaqarpunga inuit iluliamerngit takugunikkit Nunatta sermersuata sekundimut iluliaminernik taama ittunik 1.000-inik iigarfiusarnera eqqarsaatersuuteqarfigissagaat taamaalillutillu pissutsit aamma allaanerusumik isiginialerlugit, Minik Rosing KNR-imut taama oqarpoq.
Aamma atuaruk COP21 Silap pissusia pillugu akerliussutsimik Canadami takutitsisoqartoq
Aamma atuaruk ASSIT Nunarsuup kiatsikkiartornera pillugu ingerlaaqatigiittoqartoq
Minik Rosingip neriuutigaa CO2-mik aniatitsinerup annikillisarnissaanut pituttuisussamik politikerit isumaqatigiissuteqarsinnaassasut. Tamatumalu piaartumik pinissaa aamma kissaatigaa.
Nunalli tusagassiorfiillu taama amerlatigisut ataatsimeersuarnermut peqataanerat immini aamma allannguisinnaassanasoraa.
- Isumaqatigiissuteqartoqarnissaa soorunami neriuutigaara, aammalu maannakkut iliuuseqartoqartariaqarneranik aallartisaasariaqarnermillu arlaatigut paaseqatigiiffiuniunissaa neriuutigaara. Pituttuisussamilli isumaqatigiissusiortoqartariaqarneranik paaseqatigiittoqarnissaa immaqa pingaarnerpaavoq.
Taamaaliornikkummi inuussutissarsiutinik ingerlatallit nukissiuutinut minguitsunut ikaarsaarnissaq aamma tapersersulissavaat.
- Aningaasalersuisartut nukissiuutit minguitsut aammalu nukissiuutit ataavartut assigisaallu soqutigilersimavaat. Aamarsuarnit uuliamillu aalaakkaanerulersimapput aningaasatigullu iluanaarutitaqarnerulersimallutik. COP21-mili arlaatigut pisoqartariaqarnera suli pingaaruteqarpoq, nukiilli allat aamma sunniuteqaqataapput, Minik Rosing taama oqarpoq
Iluliamerngit Parisimi Place du Pantheonimi decembarip sisamaanit takusarneqarsinnaalissapput.
Aamma atuaruk COP21 Silap pissusia pillugu Parisimi ataatsimeersuarneq ullumi aallartippoq
Aamma atuaruk COP21 Inuit 10.000-ilikkaat akerliussutsiminnik takutitsipput
Aamma atuaruk COP21 Iluliarmerngit 100 tons Parisimut
Aamma atuaruk COP21 Naalagaaffiit Peqatigiit ataatsimeersuartisinissaanut nalunngisariaqakkatit
