COP21 Iluliarmerngit 100 tons Parisimut
Tassani suliffeqarfik namminersortoq Greenland Group Aps. najuutsitissaaq. Nunatta sermersuata aakkiartornera immikkullarissumik takutinniarpaat.
- Iluliarmerngit 100 tons sinnerlugu Parisimi saqqummersinnissaat pilersaarutaavoq, Greenland Group Aps-imi piginneqataasoq Kuupik Kleist oqarpoq.
Suliffeqarfik piginneqataaffia sermiminernik takutitsinissamik suliaqartuuvoq, eqqumiitsuliortoq Danmarkimiit Islandimiillu kingoqqisoq Olafur Eliasson aamma professor Minik Rosing tamatumani suleqataapput.
50.000-it naapissapput
Silap pissusiata allanngoriartornera pillugu Parisimi ataatsimeersuartoqassaaq. Tassani inuit 50.000-it missaaniittut nunanit 195-ineersut naapissapput.
Taakkununngalu iluliarmerngit takussutissiarineqassapput.
- Pilersaarutaavoq Place du la Republikkimi iliorarneqassasut nalunaaquttatut ilusilerlugit tassa 1-minngaannik 12-imut piffissap ingerlanera eqqarsaatigalgu taava aakkiartuaassasut inuillu periarfissaqassasut aggerlutik takussallugit, attussallugit paasissallugulu sermip qanoq pissuseqarnera sermersuup aakkiartornera eqqarsaatigalugu.
Issittumi sermip aakkiartornerata nunarsuup sinneranut sunniuteqarnera paasitinniarneqartoq taassuma aamma oqaatigaa.
Aamma atuaruk COP21 Naalagaaffiit Peqatigiit ataatsimeersuartisinissaanut nalunngisariaqakkatit
- Inuit namminneq aatsaat takusinnaasaminnik attorsinnaasaminnillu misigisaqarunik taava paasilluarsinnaanerulissagaat nunarsuarmi susoqarnersoq.
Parisimi pinerliisoqarnerata kinguneranik sillimaniarneq sakkortusineqaqqavoq. Greenland Group Aps.-ilu akuersissummik tunineqareersimagaluartoq, takutitassatik apuussinnaanerat maanna nalorninartoqarpoq.
- Tassa suli pilersaarutigaarput aqagu Parisiliarniarluta kisianni suliassarput suli naammassisinnaanerlugu naluarput, Kuupik Kleist oqarpoq.