Minik Mikaaleerarlu soraarummeernerminni 12-imik karakterinnattut

Minik Aronsen Mikaaleeraq Durhuusilu Danmarkimi innaallagisserisutut ilinniagartik, soraarummeerlutik misilitsinnerminni 12-imik karakterinnaffigaat. Tamannalu qaqutigoortuusoq, Den Jyske Håndværkerskolemi attaveqaqatigiinnermii suleqataasup Henrik Joel Dons Christensenip oqaatigaa. 

Minik Aronsen 35-inik ukiulik Paamiuneersoq, Danmarkimi innaallagisserisutut inaarutaasumik misilitsikkami angusarissaartunut ilaavoq.

Minik Aronsen ukiukitsumik erneqarpoq ilinniarnerminilu misilitsinnerit tamaasa angusiffiginissai sukataarutigisimaqaa, angusinngitsuussagaluarunimi ilinniakkani aallaqqaataaniit ingerlateqqissallugu oqaluttuarpoq.

- Nuanneqaaq. Siullermik sukataarnikuunermik, angusinngitsuussagaluaruma ilinniagaq uteqqittussaagakku, tassa taanna pinngitsoorniarlugu sukataarnikuuvunga, Minik Aronsen oqarpoq.

Fagets Medaljennattoq

Minik Aronsenilu kisimiinngilaq, Mikaaleeraq Durhuusimi 24-nik ukiulik Narsameersoq soraarummeerutaasumik misilitsikkami aamma angusarissaarpoq. Saniatigullu sulisitsisorisamit tunniunneqartartoq fagets medalje pissarsiaralugu.

- Nuannerpoq, misilitsinnerit assigiingitsut 12-erfigisimagaanni fagets medalje aatsaat pissarsiarineqartarpoq, Mikaaleeraq Durhuus oqarpoq.

Fagets medaljelu aatsaat aappassaat nunatsinneersumik pissarsiarineqartoq Henrik Joel Dons Christensen oqaluttuarpoq.

- Aatsaat aappassaaneerluta misigaarput Kalaallit nunaanneersumik Faget medaljennattoqartoq, taanna oqarpoq. 

Fagets medalje misilitsinnerni pingaaruteqartuni tassa ukiumi siullermi, ilinniakkallu naammassinerani 12-imik karakterinnassimagaanni, danskit innaallagisserisut sulisitsisuisa peqatigiiffianniit TEKNIQ-imit  tunniunneqartarpoq. Aatsaallu sulisitsisorisamit innersuunneqarsimagaanni pissarsiarineqarsinnaalluni.

Qaqutigoortuusoq

Kalaallit Danmarkimi angusarissaarlutik inaallagisserisutut ilinniakkaminnik naammassinnittarnerat qaqutigoorluinnartuusoq, Henrik Joel Dons Christensen oqaluttuarpoq. 

- Kalaallinik ilinniartuuteqartarnitsinni, ilinniartut marluk ataatsikkut angusarissaarlutik naammassinnittarnerat siornatigut misigisimanngilarput. Tamannalu qaqutigoorluinnartuuvoq, Henrik Joel Dons Christensen Den Jyske Håndværkerskolemi attaveqaqatigiinnermi suleqataasoq taama oqarpoq.

Minik Aronsen Mikaaleeraq Durhuusilu nunatsinnut angerlarunik suliffimmik misiliiffigisimasaminni sulilernissartik naatsorsuutigaat.