Minik Høegh Dam Nunatta Eqqartuussisuuneqarfiani eqqartuunneqartoq

Ikiaroornartunik tuniniaanermut tunngatillugu eqqartuussivimmi suliaq Siumumi ilaasortaasimasumut tunngasoq sivisuumik suliarineqareerluni eqqartuussuteqarfiuvoq.

Allattoq Hanna Vestergaard Hviid, Nicole Sander Bertelsen

decembarip 07-at 2023 14:41

Nutserisoq Connie Fontain

Minik Høegh-Dam Avannaata Kommuniani attaviitsuusoq Nunatta Eqqartuussisuuneqarfiani ullumi eqqartuussaavoq.

Taanna ikiaroornartunik tuniniaasimasutut unnerluutigineqarpoq.

Nunatta Eqqartuussisuuneqarfiatali ikiaroornartunik tuniniaanermut uppernarsaatissaqartinngilaa, kisianni tuniniaanermut uppernarsaatissaqarsoralugu, taamaammat pineqaatissiinngikkallartumik, ukiup ataatsip ingerlanerani pinerluuteqaqqissaguni ulluni 20-ni pineqaatissinneqarsimasunut inissiisarfimmiittussangortillugu eqqartuuppaa.

TAAMAAMMAT ILANNGUTASSIARAARPUT

KNR unnerluutigineqartut pinngitsuutitat pillugit tusarliussaqarneq ajoraluarpoq.

Unnerluunneqartullu ukiumit ataatsimit sivikinnerusumik pineqaatissinneqarsimasunut inissiisarfimmiittussanngortitat aqqi aamma saqqummiunneq ajoraluarpai.

Minik Høegh-Damili pillugu suliaq immikkut ippoq. Taanna Avannaata Kommuniani borgmesterinngortussaanikuugaluarpoq, taamaammat suliap tamanut saqqummiunneqarnissaa soqutiginaateqartoq KNR-ip nalilerpaa.

Tusagassiuinermi ileqqussat naapertorlugit Minik Høegh-Dam unnerluutigineqarnera eqqartuussivimmilu pinngitsuutinneqarnera saqqummiunneqanngilaq.

Unnerluussisussaatitaasulli suliaq nunatta eqqartuussisuuneqarfianut suliassanngorteqqimmagu suliap eqqaaneqarnissaa tamanut soqutiginaateqartoq KNR-ip nalilerpaa.

Aalajangiinissaq piffissami sivisuumi suliarineqarsimavoq.

Suliaq politikerip inigisaa politiinit 2018-imi aggustimi misissuiffigineqarmat aallartippoq.

Inigisaani aningaasat 154.805 koruunit nassaarineqarput, taakkunannga 151.900 koruunit isarussat puuanniipput sinnerilu aningaasivianiillutik. Politiit aningaasat taakku hashimik tuniniaanermit imaluunniit allatigut unioqqutitsisumik suliaqarnermeersuussanngatippaat. Nunatta Eqqartuussisuuneqarfiata aningaasat arsaarinnissutigineqarnissaat aalajangerpaa.

Suliarli Eqqartuussisoqarfik Sermersuumi 2021-mi marsip 25-ani suliarineqarmat pinngitsuutinneqarpoq. Unnerluussisussaatitaasullu suliaq suliassanngorteqqinniarlugu aalajangerpaa, taamaammat Nunatta Eqqartuussisuuneqarfiata suliarisussanngorlugu.

Aningaasat ilaqutariit suliffeqarfianneernerarai

Suliaq Nunatta Eqqartuussisuuneqarfianit arlaleriarluni kingunartinneqarpoq, ilaatigut Minik Høegh-Damip nassuiaateqarneranik kalaallisuumit oqalutsissaqannginneq pissutigalugu.

Maannali iluatsippoq. Minik Høegh-Damip eqqartuussivimmi nassuiaateqarnermini aningaasat ilaqutariit aalisarnermik suliaqarneranneersuunerarpai.

Taassumali aningaasat qanorpiaq atorneqartussaanerat Nunatta Eqqartuussisuuneqarfiani nassuiaruminaatsippaa. Taassuma tamanna qangali pisimammat eqqaamasinnaanagu oqaatigaa.

Hashimik tuniniaasimannginnerarpoq.

Eqqartuussivimmi suliaq Nuummi Nunatta Eqqartuussisuuneqarfianit maanna suliarineqarpoq, Minik Høegh-Damilu video atorlugu Ilulissaniit peqataalluni.

Aapparisimasaa hashimik tuniniaasimaneranik uppernarsaasoq

Minik Høegh-Damip aappakua Nunatta Eqqartuussisuuneqarfiani sisamanngornermi nassuiaateqarpoq. Taakku ukiuni pingasuni aappariissimapput, 2019-imilu qimallutik.

Taassuma aningaasat Minik Høegh-Damip inigisaani nassaarineqartut hashimik tuniniaanermeersut nassuiaatigaa. Tamanna politiinit killisiorneqarnermini aamma nassuiaatiginikuuaa.

Aapparisimasaata aningaasat hashimit tuniniaanermeersimaneranik oqaaseqarnera unnerluussisussaatitaasup pingaartuutillugu naggasiutigalugu oqaaseqaammini oqaatigaa.

Aamma atuarukMinik Høegh Damimik suliaq Nunatta Eqqartuussisuuneqarfiani kinguarteqqinneqartoq

Illersuisulli aapparisimasaata nassuiaateqarnera, eqqartuussivimmi assinganik nassuiaateqarmat Minik Høegh-Damip pisuutinneqarneranut atorneqarsinnaasorinngilaa.

Tamatuma saniatigut nunatsinni inuiaqatigiinni aningaasat aggorsimasut atorlugit amerlasuutigut akiliuteqartoqartartoq erseqqissaatigaa, taamaammat aningaasanik uninngasuuteqarneq isumassaqarnerpaa.

Minik Høegh-Damip Kalaallit Nunaanni Politiit angerlarsimaffianik misissuinerata nalaani aningaaserivimmi kontominik misissuinissinnaanissaat akuerisimanngikkaa eqqartuussivimmi oqaatigineqarpoq. Taamaammat unnerluussisussaatitaasup aningaasat inatsisinik unioqqutitsinani iliuuserisaninngaanneersimasorinngilaii.

Aningaasat inatsisinik unioqqutitsinani iliuuserineqartuninngaanneersimappata sooq aningaaserivimmi konto takuneqarsinnaatinneqannginnersoq unnerluussisussaatitaasoq eqqartuussisup oqaaseqarnerata kingorna inimut apeqquteqaateqarpoq.

Eqqartuussut sakkortusoq

Minik Høegh-Damili suli pinngitsuunerarpoq.

- Suliap suliarineqarnerata taama sivisutiginera tataannaqaaq. Inatsisinik unioqqutitsisumik iliuuseqanngilanga, Minik Høegh-Dam Nunatta Eqqartuussisuuneqarfiani oqarpoq.

KNR-ip suliami illersuisuusoq eqqartuussutip nalunaarutigineqarnerata kingorna oqaloqatigaa.

- Pinngitsuutinneqarnissaa kissaatigigaluarparput. Eqqartuussuteqarniarunillu eqqortumik pineqaatissiissapput, uanilu suliap 2018-imeersuunera eqqarsaatigissagaanni pinerluuteqaqqissaguni pineqarluuteqarsimasunut inissiisarfimmiittussanngortinneqarnera immaqa naammattorujussuuvoq.

- Taamaammat eqqartuussut sakkortuusoraara, suliami eqqartuussisoq, Finn Meinel oqarpoq.

Suliamili unnerluussisoq, Martin Standby Nielsen allatut isumaqarpoq.

- Eqqartuussiviup tuniniaasoqarsimaneranik eqqartuussisoqarnissaanik piumasaqarnerput malimmagu unnerluussisussaatitaasunit ilorrisimaarutigaarput.

- Aamma suliap piffissami sivisungaatsiartumi suliarineqartusimasup - maanna naammassineqarnera ilorrisimaarutigilluinnarparput. Naammassineqarnera illuatungeriinnut tamanut eqqortuunerpaavoq.

Naalli eqqartuussut sakkortugaluartoq suliap naammassinera Minik Høegh-Damip illersuisuatalu iluaraat.