Minik Høegh Damimik suliaq Nunatta Eqqartuussisuuneqarfiani kinguarteqqinneqartoq

Oqalutsimik amigaateqarneq Siumumi politikeriusimasumut suliap kinguarteqqinneqarneranut pissutaavoq.

Allattoq Hanna Vestergaard Hviid, Nicole Sander Bertelsen

oktobarip 12-at 2023 10:09

Nutserisoq Paornánguak Kleist

Minik Høegh-Damimik aanngajaarniutinik tuniniaasoqarsimasinnaaneranik suliaq Nunatta Eqqartuussisuuneqarfiani ullumi aalajangiiffigineqartussaagaluarpoq.

Politikerili utaqqilaartariaqassaaq.

Suliarmi kinguartinneqarpoq Minik Høeg-Dam kalaallisut nassuiaaniarsiammat eqqartuussivillu oqalutsissarsisinnaasimanani. Eqqartuussineq taamaammat minutsialuit ingerlariilaaginnrtoq unitsinneqarpoq.

- Uannut sullitannullu qasunartorujussuuvoq, unnerluussisumulli aamma. Suliap naammassineqarnissaa tamanit qilanaarineqarsimavoq. Tamanna eqqartuussivimmut, unnerluussisumut illersuisumullu atuuppoq, taamaammat suliap kinguarteqqinneqarnera nuanninngilaq, illersuisoq Finn Meinel KNR-imut oqarpoq.

Suliaq aggustimi 2018-imi aallartippoq politikerip inissiaa politiinit misissuiffigineqarmat.

Taassuma angerlarsimaffiani aningaasat 154.805 koruunit nassaarineqarput, taakkunannga 151.900 koruunit isarussat puuini nassaarineqarlutik, sinnerilu aningaasivianiillutik. Aningaasat hashimik nioqquteqarnermeersinnaasut imaluunniit unioqqutitsisumik iliuuseqarnermeersinnaasut politiit isumaqarput.

Aamma atuarukMinik Høegh-Dam kiisami Nunatta Eqqartuussisuuneqarfianukalersoq

Suliarli Eqqartuussisoqarfik Sermersuumi 2021-mi marsip 25-ani suliarineqarmat taanna pinngitsuutinneqarpoq. Unnerluussisussaatitaasullu eqqartuussut suliarineqaqqittussanngortippaat, taamaammallu suliaq Nunatta Eqqartuussisuuneqarfiani aalajangiiffigineqartussanngorluni.

- Suliaq sullitannut artukkiisimavoq. Ilami pisoqaaqaaq, taamaammat kinguartitsisoqaqqinnera soorunami sullitannut artukkeeqqippoq. Taamaammat neriuutigaarput suliaq eqqartuussivimmi sukkanerpaaq atorlugu ullulerneqassasoq.

- Ajornanngippat qaammammi tullianiluunniit, illersuisutut eqqartuussissuserisoq Finn Meinel oqarpoq.

TAAMAAMMAT ILANNGUTASSIARAARPUT

KNR unnerluutigineqartut pinngitsuutitat pillugit tusarliussaqarneq ajoraluarpoq.

Unnerluunneqartullu ukiumit ataatsimit sivikinnerusumik pineqaatissinneqarsimasunut inissiisarfimmiittussanngortitat aqqi aamma saqqummiunneq ajoraluarpai.

Minik Høegh-Damili pillugu suliaq immikkut ippoq. Taanna Avannaata Kommuniani borgmesterinngortussaanikuugaluarpoq, taamaammat suliap tamanut saqqummiunneqarnissaa soqutiginaateqartoq KNR-ip nalilerpaa.

Tusagassiuinermi ileqqussat naapertorlugit Minik Høegh-Dam unnerluutigineqarnera eqqartuussivimmilu pinngitsuutinneqarnera saqqummiunneqanngilaq.

Unnerluussisussaatitaasulli suliaq nunatta eqqartuussisuuneqarfianut suliassanngorteqqimmagu suliap eqqaaneqarnissaa tamanut soqutiginaateqartoq KNR-ip nalilerpaa.

Minik Høegh-Dam Avannaata Kommuniani attaviitsuulluni politikeriuvoq.

Siumumi siornatigut ilaasortaavoq, suliarli Nunatta Eqqartuussisuuneqarfianut suliareqqitassanngortinneqarmat partiimit 2021-mi anisitaavoq.

Suliap qaqugu eqqartuussivikkoortussanngorteqqinneqassanersoq eqqartuussivimmit massakkut oqaatigineqarsinnaanngilaq.