Minik Høegh-Dam kiisami Nunatta Eqqartuussisuuneqarfianukalersoq

Minik Høegh-Dam Nunatta Eqqartuussisuuneqarfiani unnerluutigineqartup sisamanngorpat issiavianiissaaq, hashimik tuniniaasimasinnaanera pillugu suliap arlaleriarluni kinguartinneqareersorlu.

Allattoq Nicole Sander Bertelsen

oktobarip 10-at 2023 12:25

Nutserisoq Paornánguak Kleist

Minik Høegh-Dam aanngajaarniutinik tuniniaasimasinnaanermik suliamik sivisuumik uninngasuuteqarsimavoq, sivisuumillu utaqqereerluni suliaq maanna Nunatta Eqqartuussisuuneqarfianut anngussimalluni.

Tamanna Siumumi politikeriusimasumut eqqartuussissuserisutut illersuisumit Finn Meinelimit aamma Nunatta Eqqartuussisuuneqarfianit KNR-imut uppernarsarneqarpoq.

Suliaq Eqqartuussiveqarfik Sermersuumi 2021-mi marsimi ingerlanneqarpoq, tassani Minik Høegh-Dam pinngitsuutinneqarluni, suliamili unnerluussisup Martin Strandby Nielsenip Nunatta Eqqartuussisuuneqarfianut ingerlaannaq suliareqitassanngortippaa, taamanimiillu suliap ingerlaqqinnissaa tamanit utaqqineqarsimalluni.

Minik Høegh-Damip eqqartuussissuserisutut illersuisua naapertorlu suliap Nunatta Eqqartuussisuuneqarfianit suliarineqarnissaa naatsorsuutigiinnarneqarsinnaangilaq.

Suliaq naatsumik

Minik Høegh-Dam Avannaata Kommuniani attaviitsuulluni politikeriuvoq.

Siumumi siornatigut ilaasortaavoq, suliarli Nunatta Eqqartuussisuuneqarfianut suliareqqitassanngortinneqarmat partiimit 2021-mi anisitaavoq.

TAAMAAMMAT ILANNGUTASSIARAARPUT

KNR unnerluutigineqartut pinngitsuutitat pillugit tusarliussaqarneq ajoraluarpoq.

Unnerluunneqartullu ukiumit ataatsimit sivikinnerusumik pineqaatissinneqarsimasunut inissiisarfimmiittussanngortitat aqqi aamma saqqummiunneq ajoraluarpai.

Minik Høegh-Damili pillugu suliaq immikkut ippoq. Taanna Avannaata Kommuniani borgmesterinngortussaanikuugaluarpoq, taamaammat suliap tamanut saqqummiunneqarnissaa soqutiginaateqartoq KNR-ip nalilerpaa.

Tusagassiuinermi ileqqussat naapertorlugit Minik Høegh-Dam unnerluutigineqarnera eqqartuussivimmilu pinngitsuutinneqarnera saqqummiunneqanngilaq.

Unnerluussisussaatitaasulli suliaq nunatta eqqartuussisuuneqarfianut suliassanngorteqqimmagu suliap eqqaaneqarnissaa tamanut soqutiginaateqartoq KNR-ip nalilerpaa.

Allisiguk

Politikerip angerlarsimaffia politiinit 2018-imi aggustimi misissoqqissaarneqarmat suliaq aallartippoq.

Taassuma angerlarsimaffiani aningaasat 154.805 koruunit nassaarineqarput, taakkunannga 151.900 koruunit isarussat puuini nassaarineqarlutik, sinnerilu aningaasivianiillutik. Aningaasat hashimik nioqquteqarnermeersinnaasut imaluunniit unioqqutitsisumik iliuuseqarnermeersinnaasut politiit isumaqarput.

Suliarli Eqqartuussisoqarfik Sermersuumi 2021-mi marsip 25-ani suliarineqarmat taanna pinngitsuutinneqarpoq. Unnerluussisussaatitaasullu eqqartuussut suliarineqaqqittussanngortippaat, taamaammallu suliaq Nunatta Eqqartuussisuuneqarfiani aalajangiiffigineqartussanngorluni.

Suliareqqitassanngortitsineq akuerisaava?

Finn Meinel juulimi isumaqarpoq suliap suliareqqitassanngortinneqarsimanera ilumut eqqortuusimaneranut tunngatillugu malittarisassanik ilumut eqquutsitsisoqarsimanersoq.

- Apeqqut tassaavoq unnerluussisussaatitaasut suliareqqitassanngortitsinermi sulianut tunngatillugu malittarisassat eqquutsissimaneraat, taanna KNR-imut taamani oqarpoq.

Tamanna ilaatigut pissutigalugu suliaq Nunatta Eqqartuussisuuneqarfiani kinguartinneqaqattaarsimavoq. Kingullermik juulimi kinguartinneqarpoq eqqartuussinissaq sioqqutilaalugu paasissutissanik nutaanik takkuttoqarmat.

Piffissap tamatuma ingerlanerani illersuisup Nunatta Eqqartuussisuuneqarfiatigoorteqqaarnagu Hæjesteretimut qaqeriaraluarpaa noqqaassuteqarnerli højesteretimit itigartinneqarsimasoq taamaammallu suliaq Nunatta Eqqartuussisuuneqarfiani sisamanngorpat suliarineqassasoq, KNR-imut oqarpoq.

Suli pitsaanerulernissatsinnut ikiortigut! Nutaarsiassamut malugisaqaruit uunga allaffigitigut.