Minik Høegh-Dam kommunalbestyrelsemi Siumukkormiumik taarserneqassaaq

Siumumeersoq Timotheus Petersen, attaviitsup Minik Høegh-Damip Avannaata Kommuniani kommunalbestyrelsemi ilaasortaaffianut inissittussanngorpoq.

Qinigaasinnaanermut ataatsimiititaliap Minik Høegh-Damip kommunalbestyrelsemi ilaasortaasinnaannginneranik aalajangereerneratigut tamanna pisussanngorpoq.

- Piareersimajuaannalaarnikuuvunga qinigaaffilli aallartimmat. Arlaatigut pisoqarpat, naatsorsuutiginngisatsinnik pisoqariataassappat, sinniisussatut siullertut inissisimaninni ilaasortanngorsinnaanera sukkulluuniit pisinnaasoq naatsorsuutigisimavara, Timotheus Petersen nuannaarluni KNR-imut oqarpoq. Minik Høegh-Dam-illi aninera oqaaseqarfigerusunngilaa.

Minik Høegh-Dam, ikiaroornartumik anngiortumik tuniniaasartutut pasisaalluni Nunatta Eqqartuussiviani siorna eqqartuussaavoq.

Nunatta Eqqartuussivia uppernarsaatissaqanngimmat ikiaroornartulerisimanermut pinngitsuutitaavoq, kisianni pinerlunnikkut pissarsianik imminik allanilluunniit iluanaartitsisutut pisuutinneqarluni. Ukiup ataatsip iluani pinerloqqissaguni ulluni 20-ni Pinerluuteeqarsimasunut Inissiisarfiunniittussanngorlugu taamani pineqaatinneqarpoq.

KNR-imit Minik Høegh-Dam oqaaseqartinniaraluaratsigu iluatsinngilarput. 

Aningaasaliissutit equngasumik agguaanneqartut

Timotheus Petersen Kullorsuarmi najugaqarpoq, qangali politikeritut kommunalbestyrelsemi ilaasortatut sinniisussatullu Upernavik Kommuniusimasumi Qaatsuitsup Kommunianilu inissisisimasimalluni.

Avannaata Kommuniani kommunalbestyrelsemut ilaasortaalivinnermigut eqqarsaatigaa illoqarfiit sisamat kommuneqatigiimmata sanaartornermut aningaasat naligiinnerusumik agguartalissagaat sulissutigissallugu. Aningaasaleeriaatsip eqqungalluinnarsorisami arlaatigut qanoq iliuuseqarfiginissaa soqutigivaa.

- Ullumikkut Avannaata Kommuniani illoqarfiit sisamat nunaqarfippaalorujussuillu taakkua aningaasalersueriaaseq illoqarfikkaartumik taassuma equngalluinnartup arlaatigut qanoq iliuuseqarfiginissaa uanga soqutigisorujussuuara taavalu aamma maannamut qinersisartut ilaatgut oqallipput avannaata kommunianingaanniit aninissaq eqqartorlugu. Sanaartugassat annerpaartai maanna Ilulissanut aningaasaliissutit tutsinneqartarput, taavalu isorliunerusuneersuusunut uagut annikitsuinnarnik inoqassuseq aallavigalugu aningaasalersuinermut atatillugu sanaartugassanut annertuallaanngitsumik pissarsisarluta, oqarpoq.

Isumaqarpormi, Upernavimmi pigisaanilu aamma Uummannami pigisaanilu innuttaasut politikerinit tusaaniarneqanngippallaartut.

Kommuni ataatsimoortoq

Timotheus Petersenip kissaataasa annersarissavaat Upernaviup Uummannallu kommuneqatigiilernissaat.

Tamannali kisimiilluni anguniarsinnaannginnerarpaa. Parteeqatini suleqatigissallugit oqaatigaa.

- Soorunami kisimiillunga aalajangiisinnaanngilanga. Aamma Siumup gruppeani suleqateqartussaavunga, taakkua aamma qanoq isummerfigisinnaaneraat taamatut siunnnersuummik qaqitaqassaguma aamma oqaloqatigeeqqaarnerit pisissaaapput. Paasinarsissaaqw ilumut taamatut ilusilimmik qaqitsisariaqalersimanersugut tunngavilersuutit soorunami taakkua innuttaasut oqariartuutaat tusaaniarluaqqaarlugit, soorlu oqartunga, apuuttoqarsinnaanissaa naatsorsuutigalugu., oqarpoq.

Timotheus Petersenip kommunalbestyrelsemi ilaasortanngorneratigut inissani 17-iusuni Siumumeersut arfineq-pingasunik issiatitaqalissapput.

Avannaata Kommuniata borgmesteria attaviitsuusoq Palle Jerimiassen borgmesteriutitaqartuni suleqatigai Inuit Ataqatigiit, Atassut, Demokraatit, Naleraq namminerlu attaviitsoq. Siumukkut illuatungiliuttuupput.