Tuttut uumasuaraqartut
Piniartut tuttuni uumasuaqqanik assigiinngitsuni ukioq manna takusaqarsimallutik oqaatigaat.
Tuttut uumasuarallit pinngortitami qimaannarneqarpata qanoq sunniuteqartarnersut tuttunniallu nammineq qanoq iliuuseqarpata siaruarternaveersaarnissaat anguneqarsinnaanersoq akissutissarsiorparput.
Tuttunniarnerup aallartinneranit maanna qaammatit marluk qaangiupput.
Uumasuaqqalli tuttunniarnermut nuannaarnermut unitsitsipput.
Qumaat. Qumaarsussuit. Miluuttut. Tuttut kumai.
Tuttunniat ilaat aattuinerminni tamakkuninnga ukioq manna naammattuuisaarput. Aalibak Poulsen Atammimmeersoq naammattuuisut ilagaat:
- Quttoraata nalaani taavalu timaani, kiasiisa nalaani ameeraanni erseqqaarittartorujussuugamik. Ilai amerlasarnermik.
Kangerlussuarmit Jacob Stork aamma taama nalaataqarpoq:
- Nikkuliaralugu aallartileruttorlugu, tuttu ilaa saattuaqqamik aggortarput. Taava 3 minutsiugunanngilarluunniit taamatut aggoreerlugu, manisereerlugu ataani, neqi isigiinnarlugu ajunngeruttortoq ataani imaaliorlutik aallartittupajuugamik, taanna oqarpoq, nangillunilu:
- Soorlu qullugiaasarsuit amitsuaraaqqat takisuut. Aali imatut aggorluareerlugu suli uumarujoortut.
Inunnut suli tunillaassuisoqanngitsoq
Tuttuni uumasuaqqanut tunngatillugu Inatsisartunut ilaasortaq Jens Frederik Nielseni Aalisarnermut Piniarnermullu Naalakkersuisumut ernumassutissaqartoqarnersoq apeqquteqarpoq.
Tuttuni uumasuaqqat ilaat tuttut peqqissusaannut sunniuteqarsinnaasut, allallu inunnut napparsimalersitsisinnaasut, Kim Kielsen akissummini ilaatigut nassuiaavoq.
Nunatsinnili inuit tuttut uumasuaraannit tunillanneqarsimanersut pillugu nalunaarsuisoqarsimanngitsoq aamma oqaatigalugu.
Taamaakkaluartorli Jacob Storkip pisaami neqai misissoqqissaartalernikuuai:
- Pisarineraniit taakkua marseqqissaartalernikuuagut. Ingappoq taakku suaasatut iusattut, taanna oqarpoq, nangillunilu:
- Taakku uumasut nakorsaannut apeqqutiginikuugakkit aamma. Qanoq pisagaanersut. Qimminulluunniinngooq nerukkaatissaannginnamik. Sunut tamanut pisaramik.
Igiinnarneqanngikkuni qalalluarneqassasoq
Tuttu qumaarsussuaqarpat piiarneqarsinnaasut, nerineqassagunili uulluarnissaa innersuussutigineqarluni, naalakkersuisoqarfimmit nassuiaatigineqarpoq.
Qimaannarneqarnissaali pinaveersaaqquneqarpoq, qimaannarneqarpat uumasunut allanut tuniluussinnaammat, matooqqaarlugu qimanneqassasoq ikuallaaviliaanneqassasorluunniit innersuussutigineqarpoq.
Jacob Storkilu taamaaliortalereerpoq:
- Eqqaavimmut ingerlaannaq ilisarpagut taamaattunik nalaarsigaangatta.
Tuttuni uumasuaqqat pillugit paasisaqarnerorusukkuit Pinngortitaleriffiup nittartagaani, natur.gl-imi paasissutissanik amerlanerusunik pissarsisinnaavutit.
