Aavarfinnguliivippoq: GPS-italinnik qungasequsikkanik issussinasi
Sapaatit akunnerata tulliani sisamanngornermi aggustip aallaqqaataani aavarfinngussaaq.
Kangerlussuulli Sisimiullu eqqaannut aavariat tuttunik issussitinnatik misissoqqissaaqquneqarput.
Pinngortitaleriffimmeersummi Kangerlussuarmi Sisimiullu eqqaanni tuttut ingerlaarfii qanorlu issuseqarnersut paasinerujumallugit tuttorpaat GPS-ilinnik upernaaq qungasequsersorpaat.
Pinngortitaleriffiup miluumasunut timmissanullu immikkoortortaqarfiani pisortaq Fernando Ugarthe taama oqarpoq.
- Tuttorpaat taakkua ingerlaarfiinik ullormut arlaleriarlutik nalunaarsuisartunik qungasequteqarput. Tassa Kangerlussuarmi ingerlaarfii qaammatinilu kingullerni ingerlaarfigisimasaat nalunaarsugaataatigaavut.
Nalunaarsugaataatitillu taakkua ilisimatuussutsikkut misissuinerminnut naleqarluinnartuusut, taanna oqarpoq.
- Ingerlaarfii isorartusut, sumi neriniarfeqartarnersut ataatsimoortarnersullu ukiullu qanoq ilinerani ingerlaalertarnersut takusinnaavarput. Paasisaqarfigeqaavut.
Tuttunik qungasequsikkanik issussinasi – siummiulinnilli issussigitsi
Pinngortitaleriffimmeersut tuttunut 40-nut qungasequtsiussaat takoriaannaassapput.
Tuttunillu tamakkuninnga issussinnginnissaq pingaaruteqartoq, Fernando Ugarthe oqarpoq.
- Tuttunik tamakkuninnga issussisoqaqqunanngeqaaq, qungasutsiussavummi ukiuni tulliuttuni pingasuni sisamaniluunniit misissuinitsinnut iluaqutaaniartussaapput. Tuttumik tamaattumik issussisoqarpat paasinerunissaannut misissuinitsinnut akornutaassaaq. Tuttoqaqigami qungasequsigaanngitsumik qularnanngitsumik tuttuttoqarsinnaajumaassaaq.
Ilisimatuussutsikkut misissuisut Pinngortitaleriffimmeersut tamatuma saniatigut tuttut 38-t aamma siummiulersorpaat. Taakkuninngali issussinaveersaaqqusinngillat.
Siummiulinnilli tuttuttut tuttutami siummiuinik nassittassagaatik tunniussiffigiartortassagaatilluunniit neriuutigeqigitsik, Pinngortitaleriffimmeersut oqarput. Qungasequsikkamik tuttuttoorsimasut aamma taamaaliorumaartut neriuutigaat. Tamakkuninngalu tuttuttut tuttutami siuaasa alliit alleruilu ilanngullugit taamaaliorpata qujarutissaqigitsik aamma oqaatigaat.
