Minik Høegh-Dam kommunalbestyrelsimit ilaasortaajunnaarsinneqartoq
Attaviitsoq, Minik Høegh-Dam Avannaata Kommuniani kommunalbestyrelsimut ilaasortaajunnaarsinneqarpoq.
Tamanna qinigaasinnaanermut ataatsimiititaliap ullumi aalajangeraa, Isumaginninnermut, Suliffeqarnermut Nunamullu Namminermut Naalakkersuisoqarfik tusagassiuutinut nalunaarummi allappoq.
Minik Høegh-Damip Nunatta Eqqartuussisuuneqarfianit suliami aanngajaarniutinik tuniniaasimasutut unnerluutigineqarfigisamini eqqartuunneqarsimanera pissutaavoq.
Nunatta eqqartuussisuuneqarfianit ikiaroornartunik tuniniaasimanermut uppernarsaatissaqartinngilaa, taamaakkaluartorli eqqartuussiviup tuniniaasimasutut eqqartuuppaa. Taamaammat pineqaatissiinngikkallartumik, ukiup ataatsip ingerlanerani pinerluuteqaqqissaguni ulluni 20-ni pineqaatissinneqarsimasunut inissiisarfimmiittussanngortillugu eqqartuuppaa.
Politiit inaannik misissuisut
Qinikkap inigisaata politiinit 2018-imi misissuiffigineqarneranit aallartippoq.
Politiit misissuinerminni aningaasanik 154.805 koruuninik nassaarput, taakkunannga 151.900 koruunit isarussat puuini toqqorsimapput, aningaasallu sinneri aningaasivianiillutik. Aningaasat hashimik tuniniaanermeersinnaasut imaluunniit unioqqutitsisumik suliaqarnermeersinnaasut politiit isumaqarput.
Suliarli Eqqartuussisoqarfik Sermersuumi 2021-mi marsip 25-ani suliarineqarmat Minik Høegh-Dam pinngitsuutinneqarpoq. Unnerluussisussaatitaasullu suliaq suliarineqaqqitassanngortimmagu Nunatta Eqqartuussisuuneqarfia suliami eqqartuussisussanngorpoq.
Eqqartuussivimmi suliaq Nunatta Eqqartuussisuuneqarfiani arlaleriarluni kinguartinneqarpoq, ilaatigut Minik Høegh-Damip kalaallisut ilisimannittut nassuiaateqarneranut oqalutsissaaleqineq tamatumani pissutigalugu.
Nunatta Eqqartuussisuuneqarfiata suliaq decembarip arfineq-aappaani aalajangiiffigaa. Taassumalu pineqaatissiinngikkallartumik ullunik 20-nik eqqartuunneqarnerata saniatigut aningaasat 153.805 koruunit arsaarinnissutigineqarput.
Borgmesterinngortussaagaluartoq
Minik Høegh-Dam Siumut sinnerlugu Avannaata Kommuniani kommunalbestyrelsimut qinigassanngortippoq. Qinigaalluarporlu: Taanna 406-init taaguunnearpoq, taamaalillunilu kommunimi qinigaanerpaalluni.
Taamaalillunilu borgmesterinngortussanngoraluarpoq. Atuuffik taanna Palle Jerimiassenimit piffissami tassani atuuffigineqarpoq – taannalu Minik Høegh-Damip borgmesterinngortussanngorneranut akerliulluni partiimit tunuarnikuulluni. Taannami amerlanerussuteqartunit tunuliaqutserneqarluni attaviitsuulluni borgmesterinngorpoq.
Tamatuma kingunitsianngua Minik Høegh-Dam Siumumit tunuartinneqarpoq.