Nunatta ataa minguinnerpaamik titaanitalimmik saviminissaqarsinnaasoq

Saviminissaq titaniumilik qalipaammut qaqortumut pingaarnertut atorneqartarpoq, printerinullu nutaalianut 3D-mik pisagaannut aamma atorneqartarluni. Saviminissaq titaniumilik Pituffiup eqqaani nassaassaavoq.

Aviisi The Telegraph Business taama allaaserisaqarpoq.

Tuluit aatsitassarsiortuisa ilaata BlueJay Miningip Pituffiup eqqaani misissuinermini inerniliuppaa saviminissaq titaniumilik sukuluinnerpaasa ilaat tamaani nassaassaasoq, soorlu aamma nunarsuarmi peqarnerpaaffiunissaa aamma ilimagineqartoq.

BlueJay Mining FinnAustimik siornatigut ateqarpoq, Pituffiullu eqqaani aatsitassarsiorsinnaanissamut akuersissutip Avannaa Exploration Limitedimit FinnAustimut tunniunneqarnissaa Naalakkersuisunit siorna decembarimi akuersissutigineqarluni.

AAMMA ATUARUK Piiaavinnik suliniutit pingasut tuluit piiaanermik ingerlatseqatigiiffiata pisiarai

Tamaani saviminissap titaniumillip sukuluissusiata takutippaa nunarsuup sinneranut unammillersinnaassuseqarsinnaasoq, BlueJay Miningip pisortaa Roderick McIllree oqarpoq:

- Saviminissap titaniumillip nunarsuarmi niuffaffinni assigiinngitsuni piumaneqarnera annertusiartorpoq, Amerika avannarlermit Kinamut, piiaaffissatsinnilu saviminissap titaniumitallip sukuluinnerata takutippaa tamaattumik tuniniaasartut unammillerluarfigisinnaagivut, Roderick McIllree oqarpoq.

Misissuinerit sinneruttut naammassilluarpata, iluatsilluarsinnaassappatalu Pituffiup ungasinngisaanit aappaagumit tunisassiulersinnaanissani BlueJay Miningip naatsorsuutigigaa, The Telegraph Businessip allaaseraa.

Pituffiup eqqaani piialersinnaanissamut akuersissut BlueJay Miningip tigummagu, tassunga ilutigitillugu Kangerluarsummi Qeqertarsuup Nuussuullu nalaani misissuinissamut akuersissutit aamma pisinnaatitaaffigilerpai.