Mette Frederiksen aamma Múte B. Egede iluliarsuarnik neeqquluttunik avatangiisilerlutik: Silap allanngornera iliorfigineqartariaqarpoq
Ministeriunerup Mette Frederiksenip Ilulissanut ippassaq tikeraarnermini silap pissusiata allanngoriartornera pingaartillugu paasisassarsiorfigingaatsiarpaa.
Tamannami ima initutigaaq allaat ministeriunerup Naalakkersuisullu siulittaasuata, Múte Bourup Egedep tusagassiortunik katersortitsinissartik pilersaarutit malillugit akunnittarfimmi Hotel Arcticimi pisussaagaluartoq Ilulissat Kangerluanut angalaarnerminnut nuuppaat.
Iluliarsuillu tunuliaqutaralugit ippassaq ualisoq katersortitsinerminni ministeriunerup naalakkersuisullu siulittaasuata silap pissusiata allanngoriartornerata kinguneri ataatsimut akiugassaasut isertuutinngilaat.
AAMMA ATUARUK Mette Frederiksen peqatigalugu Ilulissanit tusagassiortunik katersortitsinissaq taamaatiinnarneqartoq
- Isumaqarpunga Naalakkersuisut nutaat Parisimi isumaqatigiissummut ilanngunniarlutik aalajangernerat pitsaalluinnartuusoq. Taamaalilluta naalagaaffeqatigiinnermi akiuuteqatigiissinnaagatta. Suleqatigiinnerussaagut, Mette Frederiksen Ilulissat Kangerluani ippassaq taama oqarpoq.
Silap pissusia pillugu annertunerusumik suleqatigiinnissamut kissaateqarneq qanoq pilersaarnermik nalunaarummik malitseqarpoq. Marlunngormat Nuummi Múte B. Egede aamma Mette Frederiksen qanoq pilersaarnermik nalunaarut atsiorpaat, taassumalu Kalaallit Nunaanni erngup nukinganik nukissiorfiit aningaasalerneqarnissaat imaraa.
Suliniutip taassuma nunami maani nukissiornermi nukiit ataavartut atorneqarnerat annertusisissavaa.
Kalaallit Nunaanni erngup nukinganik nukissiuutinut aningaasanik atornissaq pillugu qanoq pilersaarnermik nalunaarut
Inatsisartuni amerlanerussuteqartut erngup nukinganik nukissiorfiup Utoqqarmiut Kangerluarsunnguaniittup Nuummi innaallagialersuisup allineqarnissaa aamma erngup nukinganik nukissiuuteqarfiup nutaap Aasiannut Qasigiannguanullu pilersuisussap pilersinneqarnissaa siorna novembarimi akuersissutigaat.
Tamanna akikitsuinnaanngilaq. Aalajangiinerup kingunerisaanik sanaartornernut aningaasaliissutissanik koruuninik 3,1 milliardinik nassaartoqartariaqartoq. Aningaasat taakku novembarimi suli pissarsiarineqanngillat.
Danskit naalagaaffiat qanoq pilersaarnermik maanna nalunaaruteqarpoq, taanna pissutigalugu Naalakkersuisut erngup nukinganik suliniutinut Danmarkimit taperserneqarlutik nunat tamaalaat akornanni atorniartarfimmit annerpaamik 3,1 milliardit koruuninik atorsinnaapput – imaluunniit nunarput Danmarkimit atorsinnaavoq.
Pingasunngormat Mette Frederiksen aamma Múte B. Egede Ilulissani tusagassiortunik toqqannartumik aamma katersortitsisussaagaluarput. Kisianni tassanngaannartumik allanngortinneqarpoq, naalakkersuisunut siulittaasut taakku marluk umiatsiamut ikereersullu.
AAMMA ATUARUK Partiit talerperliunerusut danskit erngup nukinganik nukissiorfinnut aningaasaleeqataasinnaanissaat ilorrisimaarutigigaat
Pilersaarutitut Hotel Arctic-imi tusagassiortunik katersortitsinissamut taarsiullugu malaatiinnarlugu umiatsimi tamanna pivoq, toqqaannartumilli aallakaatinneqanngitsoq.
Mette Frederiksen Múte B. Egedelu naapertorlugit avatangiisit malaatiinnarlugu tusagassiortunik katersortitsinermut tulluarnerummata tassani pivoq.
- Erngup nukinganik nukissiornermi suleqatigiilluarusunnerput ersarissumik takutipparput. Kisianni maanna Ilulissat Kangerluanniilluta takusinnaavarput sermip qanoq sukkatigisumik aakkiartornera kiisalu minnerunngitsumik allannguutit ukiualunni taama annertutiginerat, Mette Frederiksen oqarpoq nangillunilu:
- Taamaattumik maanna maaniinnitta uppernarsarujussuarpaa silaannaap kiatsikkiartornera akiorniarlugu sukkanerusumik sulissasugut.
Kalaallit Nunaata erngup nukinganik ilippanartui nunarsuarmut tuniniarneqassapput
Naalakkersuisullu siulittaasuata silap pissusia eqqartortillugu suleqatigiinnerup pingaaruteqassusaa erseqqissarpaa.
- Silap pissusiata allanngoriartornera ikioqatigiinnikut taamaallaat akiorneqarsinnaavoq.
Ruslandip Ukrainemik tiguaaniarnerata kingornatigut uuliap gas-illu akii nunani arlalinni qaffapput. Saniatigullu EU nutaamik siunnerfeqarpoq russit gas-iutaannut uuliaataannullu annikinnerusumik pituttorsimaniarluni.
AAMMA ATUARUK Danmark nunatta erngup nukinganik nukissiorfiliornissaanut milliardilikkaanik atorsinnaanissamik ikiuiniartoq
Tassani Múte B. Egede isumaqarpoq Kalaallit Nunaata EU qorsuusumut allanngoriartornermi ikiorsinnaagaa.
- Nukissaqarnermut politikki aamma isumannaannissamut massakkorpiaq politikkiuvoq. Qorsuunerusumik nukissaqarniarnermut allanngoriartuaarnermik siunertarisami nunat arlallit siunniussaat tuaviuunnerulerneqartariaqarpoq Ruslandimit nukissat tungaasigut ataannarnissaq qimanniarneqarmat.
- Tassa sukkanerulertariaqarpugut, taamalu Kalaallit Nunaanni ilippanaatit annertoorsuupput, engup nukinganik nukissiornissamut ilippanaateqaqaaq nunarsuarmi qorsuunerusumut allanngoriartornermi atorneqarsinnaasunik.