Mette Frederiksen peqqinnissaqarfimmut ikiuinissamut piareersimasoq
- Susassaqarfimmut tassunga soorunami suleqatiginnikkusuppugut.
Mette Frederiksen (S) siuttoralugu Danmarkimi naalakkersuisunngortitsisoqassappat, taakku nunatsinnit nammineq kissaatigineqarpat peqqinnissaqarfimmut ikiuerusupput.
Atassut: Danmarkip nunatsinni peqqinnissamut oqartussaaffik akisussaafigileqqittariaqarpaa
IA: Nunatsinnit napparsimasut Danmarkimi napparsimmavinnik toqqagassaqarsinnaassapput, kalaallit innuttaasut Danmarkimi kræftertunut neqeroorutinik atuisinnaassapput, peqqissartullu inaannik Aalborgimi pilersitsineq.
Demokratiit: Nunatsinni peqqinnissaqarfimmi sulisunut ilinniarfiit pikkorissarnerillu periarfissaanissaaq aamma nunanit allanit peqqinnissaqarfimmi sulisussanik tikisitsineq.
Tillie Martinussen (løsgænger): Danmarkimik pitsaanerusumik suleqateqarneq, taamaalillutik tarnikkut timikkullu napparsimasut ikiorneqarnissaminnut Danmarkimut nuuttariaqassanatik.
Naleraq: Danmarkimut qanimut suleqateqarneq. Nunatsinni danskit innuttaasut peqqissarneqarniarlutik Danmarkimukartassapput. Danskit innuttaasut peqqissarnerisa aningaasartuutaat nunatsinni peqqinnissaqarfimmik kivitsinermut atorneqassapput.
Siumut: Nunatsinni peqqinnissaqarnermut atatillugu danskinit ikiorneqarnissamut pilersaaruteqartoqanngilaq.
- Toqqaannartumik ikiuisoqarnissaa pisariaqartinneqarpat taava tamanna pillugu oqaloqatigiissaagut, Mette Frederiksen qineqqusaarnermini bussimini KNR-imit apersorneqarluni taama oqarpoq.
Peqqinnissaqarfimmi ajornartorsiutit qineqqusaarnermi sammineqangaatsiarput. Peqqinnissaqarfik nunatsinnit 1992-imiit akisussaaffigineqalereeraluartoq.
AAMMA ATUARUK Suaarut: Kalaallit Nunaat 120-nik nakorsassaalatsivoq
Nakorsat 120-t nunatsinni amigaatigineqarput – taakku nunatsinni nakorsat pisariaqartinneqartut affaanit amerlanerupput. Tamatuma saniatigut peqqissaasut, pingaartumik atorfeqavissut amigaataapput. Tamannalu pissutigalugu napparsimasut sivisoqisumik kingunerluuteqartaqisumillu utaqqisoqartariaqartarpoq.
Taamaammat Demokraatit, Inuit Ataqatigiit Naleqqallu ajornartorsiutaasut aaqqiivigineqassappata nunatta avataanit ikiuisoqarnissaa pisariaqartoq isumaqatigiissutigaat.
Atassutip peqqinnissaqarfik pillugu oqartussaaffiup Danmarkimut utertinneqartariaqarnera qineqqusaarutigaa.
AAMMA ATUARUK Partiit nassuertut: Peqqinnissaqarfipput ilungersunartorsioqaaq
Mette Frederiksenip nunatsinni ’peqqissarneqarnissamut periarfissat Danmarkimisulli assigiinngitsgisut’ erseqqissaatigaa. Nunatsinnili immikkut ittumik unammillernartoqarpoq – tassa illoqarfinni anginerusuni najugaqanngitsunut napparsimmaviit ungasingaatsiarput.
Mette Frederiksenip ’nunatsinni partiinit siunnersuutigineqartut pitsaasuusorai, taassumali nunatsinni peqqinnissaqarfimmi sumi qanorlu ikiuisoqarnissaa oqaatigerusunngilaa. Tamanna Inatsisartuni amerlanerussuteqartut aalajangertariaqarpaat.
Venstre aamma Det Konservative Folkeparti assinganik aamma nalunaaruteqarput.
Assi: Helle Nørrelund/KNR
- Nalinginnaasumik ima pisoqassaaq, Naalakkersuisut saaffiginnillutik oqassappat: Uku danskit naalakkersuisuinut suleqatigiissutigerusuppagut, tamannalu tigulluassavarput, Mette Frederiksen KNR-imut oqarpoq.
Kalaallit akisussaaffii danskinit ikiuisoqarnissaanut aporfissaqanngillat
Danmarkili nunatta akisussaaffigilersimasaanut qanoq ikiuitigissava?
Danskit naalakkersuisuusunit Folketingimit nunatsinni meeqqanut inuusuttunullu suliniutinut 80 millionit koruuninik aamma meeqqanut ilaqutariinullu sullisivinnut 17 millionit korruningajaat kiisalu Neriuffimmut 2 millionit koruunit aningaasaliissutaareerput.
Aningaasat isumaginninnermut peqqinnissamullu atugassat, akisussaaffillu Namminersorlutik Oqartussaniilluni
Mette Frederiksenip nunatsinni pingaartumik meeqqanut inuusuttunullu susassaqarfimmut ’aningaasarpassuarnik’ tunniussisoqarsimanera nassuerutigaa.
- Kisiannimi unammillernartut ilaat aaqqiissuteqarfigissallugit ataatsimut akisussaaffigigipput isumaqarpunga. Meeraapput meeqqallu ilaat sanngiilluinnartuupput, taanna oqarpoq.
Lars Løkke Rasmussen ministeriunerugallarmat nunatsinnut isumaginninnermik oqartussaaffimmut 10 millionit koruuninik tunniussisoqarpoq.
AAMMA ATUARUK Venstre Konservativellu nunatsinni peqqinnissaqarfimmut ikiuukkusuttut
Danskit partiivisa KNR-ip oqaloqatigisaasa Danmarkip ikiuinissaanut killissaq sumiinnersoq oqaatiginngilaat. Socialdemokraatit siulittaasuata aamma oqaatigerusunngilaa.
Taassumali susassaqarfinnut nunatsinnit akisussaaffigineqareersunut tapiissuteqarnissani ajorinngilaa.
- Danskit ministeriuneratut ima oqalunngilanga: ’Tamanna nammineq akisussaaffigilereerassiuk susassaqarfiginianngilarput’. Naagga, suleqatigiissinnaagutta taava isumaqarpunga suleqatigiissasugut, ministeriuneq oqarpoq.
KNR-ip Danmarkimi ministeriunertut qinigassanngortittut allat marluk aamma apersorumallugit saaffigai. Konservative Folkepartip siulittaasuata, Søren Pape Poulsenip aamma Venstrep siulittaasuata, Jakob Ellemann-Jensenip apersorneqarnissartik itigartitsissutigaat.
