Venstre Konservativellu nunatsinni peqqinnissaqarfimmut ikiuukkusuttut
Nunatta peqqinnissaqarneq 1992-mili nammineq akisussaaffigileraluarpaa.
Naalakkersuisulli kissaatigippassuk, nunatsinni peqqinnissaqarnermut atatillugu, Danmarkimili talerperliit naalakkersuulissagunik ikiuinissamut piareersimapput.
Konservative Folkepartinit nunatsinnut tunngasunut oqaaseqartartoq, Rasmus Jarlov oqarpoq.
- Kalaallit Nunaanni peqqinnissaqarfiup Danmarkimitulli pitsaassuseqassasoq isumaqarpugut. Soorunamilu Kalaallit Nunaannit kissaatigineqarpat akisussaaffimmik tiguserusuppugut, taanna KNR-imut oqarpoq.
AAMMA ATUARUK Naleraq: Danmarkimit peqqinnissaqarnermut ikiorneqartariaqarpugut
Namminersorlutik Oqartussanit ikiuinerup qanoq imaqarnissaa pillugu erseqqissumik oqaaseqartoqarnissaa piumasaqaataaginnarpoq.
- Pisarnitsitut akisussaaffinnik annerusunik tigoqqaalerusunngilagut, kisianni kalaallinit kissaateqartoqarpat Danmark ikiuinissamut soorunami piareersimavoq, Rasmus Jarlov oqarpoq.
Taanna Venstrep nunatsinnut tunngasunut oqaaseqartartuanit, Christoffer Melsonimit tapernerneqarpoq, taassumalu partii Kalaallit Nunaannit ikioqqunermik pisortatigoortumik qinnuteqartoqarpat ”suliap kinguneqartussamik isumaliutiginissaanut piumassuseqartoq” oqaatigaa.
Qanorli ikiuisoqarsinnaanissaa oqaasertalerusunngilaa. Naalakkersuisut tamanna oqaasertalissagaat, Melson isumaqarpoq.
Partiit peqqinnissaqarfimmut ikiuisoqarnissaanut kissaataat
Atassut: Danmarkip nunatsinni peqqinnissamut oqartussaaffik akisussaafigileqqittariaqarpaa
Demokratiit: Nunanit allamiunit Danmarkimeersuunngitsunik sulisut amerlanerusut
IA: Nunatsinni innuttaasut Danmarkimi peqqissarnissamut napparsimmavinnik toqqagassaqarnissaa, danskit kræftertunut katsorsaariaasianut periarfissaqarnissaa, naalagaaffiullu peqqissartut illuannik Jyllandimi pilersitsinermi akiliinerpaanissaa.
Naleraq: Danmark nunatsinni peqqinnissaqarnermut ikiuissaaq. Partiip oqarnera naapertorlugu Danmarkip peqqinnisaqarfik ingerlalluanngitsoq nunatsinnut 1992-imi tunniuppaa, tamatumalu kingorna ingerlallualersinnissaa periarfissaasimanngilaq.
Siumut: Danskit nunatsinni peqqinnissaqarnermut ikiuinissaannut tunngasoq oqallisiginngilaa.
Jarlov: Sukkasuumik aaqqiissutissaqanngilaq
Nunatsinnili partiit akornanni Danmarkip nunatsinni peqqinnissaqarfimmut qanoq pitsaanerpaamik ikiueqqaarsinnaaneranut assigiinngitsorpassuarnik isumaqartoqarpoq.
Konservative Folkepartimiilli, Rasmus Jarlovip oqarnera naapertorlugu ikiuinissamut periarfissat arlaliupput – taakkunanngali arlaannaalluunniit sukkasuumik aaqqiissutaasinnaanngilaq.
Ilinniarsimasunik atorfinitsitsisoqarnissaa ajornartorsiutaanerpaavoq.
- Aningaasat qanorluunniit amerlatigisut atorneqaraluarpata atorfiit tamarmik inuttalerneqarnissaat ajornakusuussaaq, Jarlov oqarpoq.
Danmarkimi peqqissaasut, nakorsat, peqqissaanermik ikiortit peqqinnissaqarfimmilu sulisut allat amigaataanerat aamma annertuvoq. Danskit partiivisa amerlanerussuteqartut peqqissaanermi sulisunut akissarsiat sulinermilu atugassaritigaasut pitsanngorsarneqarnissaat maanna siunnersuutigaat.
Tamanna kalaallit napparsimmavinniini atugassarititaasut pitsanngorsarnissaanut aamma atorneqarsinnaavoq.
- Aaqqiivigiuminaappoq, aningaasanummi kisimi tunngassuteqanngilaq, tamanna sulisinnaasussarsisinnaanissamut aamma tunngavoq. Amerlanerusulli ilinniartinneratigut aamma akissarsiat suliffimmilu atugassarititaasut isumaginerat aaqqiissutip ilagigaa qularnanngilaq, Rasmus Jarlov oqarpoq.
Kiisalu IA-p siunnersuutaatut nunatsinni napparsimasut Rigshospitaliuinnanngitsumi danskit napparsimmaviini allani peqqissarneqarnissaannut inissaqartoq, taanna isumaqarpoq.
- Danskit peqqinnisaqarfianut tamanna atuivallaarfiunavilanngitsoq isumaqarpunga. Danmarkimi taamaaliortoqarsinnaasoraara, Rasmus Jarlov KNR-imut oqarpoq.
Oqartussaaffimmut akisussaaffigilersimasamut ikiorneqarneq ajunngitsoq
Danmarkimi qinigaaffimmi kingullermi Folketingi nunatsinni akisussaaffiulereersimasumut tassa isumaginnittoqarnermut 80 millionit koruuninik tunissuteqarpoq. Taakku naalagaaffimmit tapiissutit 4 milliardit koruunit missaanniittut qaavatigut tunniunneqarput.
Danmarkip akisussaaffiulereerismasunut ikiuisinnissaanut aporfissaqanngitsoq konservativet erseqqissaatigaat, nunattali akiligassaq – ullumikkutulli nammineq akilertassavaa, tassa nunatta karsia nunatsinni innuttaasup assersuutigalugu Danmarkimut peqqissariartorneranut akiliuteqartarluni.
Peqqinnissaqarfimmulli atatillugu Kalaallit Nunaata peqqissaanernik tamanik nammineq kivitsisinnaannginnera aamma piffissaq ungasinnerusoq eqqarsaatigalugu pissusissamisoortoq. Rasmus Jarlov isumaqarpoq.
- Kalaallit Nunaata peqqinnissaqarfimmi immikkoortortaqarfinnik tamanik isumaginnissinnaanissaa piuviusorsiortumik naatsorsuutigisinnaanngilarput, Danmarkilu taakkunani pisariaqartitsisoqarneratigut ikiuisinnaassaaq.
Venstremit Christoffer Melsonip Danmarkip nunatsinni akisussaaffiusunik akiliilluni ikiuinissaanut killissaq sumiinnersoq KNR-imut oqaatigerusunngilaa.
KNR-ip Socialdemokraatit Danmarkip nunatsinni peqqinnissaqarnermut atatillugu ikiuisoqarnissaanik kissaateqartoqarnera pillugu oqaaseqartinniaraluarpai. Partiilli KNR-ip saaffiginnissutai suli uterfiginngilai.
