Mette Frederiksen NATO-mi qullersanngorsinnaaneragaanerminut: Atorfimmik allamik ujaasinngilanga

Mette Frederiksenip USA-p præsidentia, Joe Biden, Washingtonimi ataasinngorpat tikeraassavaa.

Danmarkip ministeriunerata NATO-mi qullersanngorsinnaanissaa pillugu tusatsiakkat taamaasillutik suli oqallisigineqassagunarput.

Folketingip naggataarutaasumik ullumi pingasunngornermi oqallinneranni taama aamma pisoqarpoq.

Kia Mette Frederiksen kingoraarlugu Socialdemokratini siulittaasunngornisssaa, taamalu ministeriuninngornissaa, Liberal Alliance sinnerlugit Folketingimut ilaasortap Ole Birk Olesenip tassani paaserusuppaa.

Mette Frederiksen NATO-mi qullersanngussappat kina siulittaasunngorsinnaanersoq Socialdemokratit iluminni nipaatsumik oqallisigigaat, aviisit Børsenip Ekstra Bladetillu allaaseraat.

Mette Frederiksen Folketingimi oqallinnerup unillatsiarnerani tamanna pillugu ilaatigut ima oqaaseqarpoq:

- Danmarkimi ministeriuneruvunga, ministeriunertullu sivisuumik suli issiasinnaanissara neriuutigaara. Atorfimmik allamik ujaasinngilanga, Mette Frederiksen oqarpoq.

Norgemi ministeriunerusimasoq NATO-mi maanna qullersaavoq. Qullersatulli taanna tunuangajalerpoq, Mette Frederiksenilu kingoraartaasussatut suli oqallisigineqarluni.