NATO-p Danmark qamussuarnik sorsuutinik nassitsinissaanik kimigiiserfigerusunngikkaa
![](/sites/default/files/styles/image_934x467/public/article_images/20230120-143711-l-6000x4000ma.jpg?itok=fcg3ppRG)
Danmark qamutilinik Caesar haubitsinik Ukrainemut nassitsimammat, NATO-p qullersaanit nersualaarneqarpoq.
NATO-p qullersaa, Stoltenberg, Tysklandimi sakkutooqarfimmi Ramsteinimi ullumi tallimanngornermi ima oqarpoq:
- Danmark Ukrainemut iliuuseqartorujussuvoq. Danmark qamutilinnik nutaanik Ukrainemut tunniussiniarluni nalunaareerpoq. Sorsunermi atortussanik amerlasuunik nunat NATO-mi ilaasortat arlaqartut pilersuiniarlutik nalunaareerput. Tamannalu ajunngilaq, Jens Stoltenberg oqarpoq.
Stoltenbergip Danmark sorsuunnermi atortunik qamussuarnik Leopard 2-nik Polenitulli Ukrainemut nassitsinissaanik kimigiiserfigerusunngilaa.
AAMMA ATUARUK Ellemann nunat iligisamik ministeriilu sakkortooqarfimmi ataatsimiittut
Danmark qamussuarnik sorsuutinik Leopardinik 44-nik peqarpoq. Taakkunanngalu 14-it Estlandimiipput. Taamaattumik qamutinik sorsuutinik Ukrainemut nassitsilersaaratik, illersornissamut ministeri Jakob Ellemann-Jensen oqarpoq.
Ukrainep præsidentiata, Volodymyr Zelenskyip, nunat killiit qamutinik sorsuutinik Ukrainemut nassitsinissaannik kaammattorpai. Qamutit sorsuutit taakkua russit sakkutuuisa Ukrainemit anisinneqarnissaannut aalajangiisuusorujussuussasut, Zelenskyj illersornissamut ministerit Tyskalndimi ataatsimiinneranni videokkut peqataatilluni oqarpoq.