Mette Frederiksen: Issittumi aallartitaq inissiliivippoq

Issittumi aallartitamik atorfinititsineq qanittumi pissaaq.

Ministeriuneq Mette Frederiksen Folketingimi ammaanersiorluni ippassaq oqalugiareerluni DR-imut taama oqarpoq.

Issittumi aallartitap atorfinitsinneqarnissaa qaqugu pissava, Mette Frederiksen DR-imit taama aperineqarpoq?

- Tamanna piffissami qanittumi pissaaq, Mette Frederiksen oqarpoq.

Tobias Elling Rehfeld pilersaarutit naapertorlugit issittumi aallartitatut septemberip aallaqqaataani atorfinittussaagaluarpoq, issittumi aallartitassatut danskit nunanut allanut tunngasunut ministereqarfiup marsip qaammataani atorfinittussatut toqqarmaguli.

Danmark issittumi aallartitamik danskiusumik tallimassaanik marsimi toqqaanerata kingorna Danmarkip Kalaallit Nunaatalu akornanni aaqqiagiinnginneq aallartippoq.

Issitumi aallartitamik toqqaasoqalermat Naalakkersuisut peqataatinneqanngillat, Issittumilu aallartitap Kalaallit Nunaanninngaaneersuunissaa Naalakkersuisut kissaatigisimavaat.

Pissaanerit naligiinnginnerat

Nunanut allanut tunngasunut ministerip issittumi aallartitap Kalaallit Nunaanninngaanersuunissaa taamani itigartitsissutigaaa. Kingusinnerusukkulli naalagaaffeqatigiit Nuummi juunip qaammataani ataatsimineranni, Issittumi aallartitap siunissami toqqarneqarneqartarnissaa allatut pisalerumaartoq, Løkke Rasmussen oqarpoq.

- Nassueritigsariaqarpara pissaaneq Danmarkip Kalaallit Nunaata Savalimmiullu akornanni oqaluttuarisaanermi naligiiissimanngimmata. Nunat pingasut naligiissutut isigineqarsimanngillat.

-Tamannalu allanngortinniarparput Kalaallit Savalimmiormiullu ataqqiniarlugit Mette Frederiksen oqarpoq.

Issittumi aallartitamik atorfinititsinissamut tamana qanorpiaq isumaqartinneqarnersoq suli ilisimaneqanngilaq.

Naalakkersuisunut siulittaasoq Mute B. Egede maajip qaammataani oqarnera naapertorlugu issittumi aallartitaq Kalaallit Nunaanninngaaneersuussaaq.