Mellembølgep taartissaa ujarpaat
![](/sites/default/files/styles/image_934x467/public/article_images/tele_parabol630_4_3.jpg?itok=AZeplXUq)
Mellembølge atorlugu nassitsissut KNR radiop sinerissap annersaani tusaaneqarsinnaaneranik qulakkeerinneqataasoq atorunnaarpoq februaarillu aqqarnat 2011 qaminneqarluni. Mellembølge atorlugu nassitsisarnermi atortorissaarutit pisoqalipput akisullutillu. Aamma mellembølgemut kingoraartissat sanaartorneerussimapput.
Ullumikkulli aaqqiissimaneq Inuit Ataqatigiinneersup Debora Kleistip naammaginngilaa mellembølgemullu taartaasussamik nassaartoqarnissaa piumasaralugu. Siunnersuut apriili naalersoq Inatsisartuni sammineqarpoq partiinit ilalersorluarneqarluni. Maanna siunnersut sanaartornermut avatangiisinullu ataatsimiititaliami sammineqareerpoq, tassanilu aamma isumaqatigiiffiusumik taperserneqarpoq.
Maanna Naalakkersuisut suliakkinneqarput mellembølgemut nassitsissutip taartissaanik nassaarniaqqullugit. Tamanna pillugu nassuiaat Inatsisartut ukiaanerani ukiormanna katersornissaannut saqqummiunneqassaaq. Tamanna erserpoq sanaartornermut avatangiisinullu ataatsimiitaliap isumaliutissiissutaani ullumi Inatsisartuni oqaluuserineqartussami.
Attaveqarnermut Naalakkersuisup Jens B. Frederiksenip kortbølge atorlugu nassitsissut periarfissaasinnaasutut taavaa. Nassitsissutit ikkussornerat 6 millioner koruuninik akeqassaaq ingerlatsinermullu ukiumut 500.000 koruuninik atuiffiusassallutik. Mellembølgemut nassitsissutit atorunnaartut ingerlatsinermut ukiumut 3,1 millioner koruuninik aningaasartuutaasaraluarput.
- Naalakkersuisulli isumaqarput tulluartuunngitsoq kortbølge atorlugu nassitsissutit kisiisa isiginiarnissaat. Naalakkersuisut kissaatigaat periarfissat allat aamma misissornissaat, Jens B. Frederiksen siunnersuut siullermeerneqarmat oqarpoq.
Taanna maanna ukiaanerani katersornissap tungaanut periarfissaqarpoq siunnersuusiornissamut. Aamma naatsorsueqquneqarpoq mellembølgep atorunnaarnerani inuit qassit eqqungaasimanersut, taamaasilluni Inatsisartut aalajangernissamut tunngavissaqarniassammata.
Sanaartornermut Avatangiisinullu ataatsimiititaliap isumaliutissiissutaa linki ataaniittoq atorlugu aasinnaavat.