Meerartaarnermut atatillugu sulinngiffeqarnermut aningaasaateqarfiup aallartinnissaa: Qaammataannanngortoq
Meerartaarnermut atatillugu sulinngiffeqarnissamut aningaasanik qinnuteqartoqarsinnaanngungajalerpoq. Aningaasaateqarfik namminersortuni sulisunut immikkut ittumik tunngassuteqarpoq. Tamanna piffissami sivisuumi sulissutigineqarsimavoq.
Inatsisartummi meerartaarnermut atatillugu sulinngiffeqartarnermut inatsit siorna akuersissutigaat. Inatsit taanna pissutigalugu suliffeqarfinnut namminersortunut meerartaarnermut atatillugu sulinngiffeqarnissamut aningaasaateqarfimmik pilersitsisoqarpoq.
Naatsumik oqaatigalugu suliffeqarfimmi pisortat suliffeqarfiutiginngisaanni sulisut meerartaarnermut atatillugu sulinngiffeqarnerminni aningaasarsiassami 80 procentii pissarsiarisinnaavai. Sulisut taakku tassaasinnaapput nujalerisut.
AAMMA ATUARUK Nujalerisup Elisap erninermusiaqarumalluni nujaleriffiutini matugallartariaqaraa
Aningaasat taakku suliffeqarfinnit namminersortunit pissarsiarineqarput.
2021-mut aningaasanut inatsit naapertorlugu aningaasaateqarfimmut ukioq manna 20,3 millionit koruuninik immikkoortitsisoqarpoq.
Juulip ulluisa aallaqqaataat – tassa qaammat ataaseq qaangiuppat – suliffeqarfinni namminersortuni sulisut meerartaarnermut atatillugu sulinngiffeqarnerminni akissarsiaqarsinnaatitaalissapput, tamannalu angajoqqaat meerartaarnermut atatillugu sulinngiffeqarnissaanut periarfissanik pitsanngorsaataassasoq, Naalakkersuisut tusagassiuutinut nalunaarummi allapput.
Erninermut aningaasaateqarfik
Namminersorlutik inuussutissarsiutillit taakkununngalu sulisut erninermut atatillugu sulinngiffeqarnerminni aningaasarsiamik 80 procentii paariinnartassagaat Naalakkersuisut anguniarpaat.
Sulisoqarnermut akitsuutip namminersortut akilertagaat 0,2 procentimik qaffaanneranit aningaasalersorneqassaaq.
Ukiumut 19 millionit koruuniussalutik.
Siulersuisut nutaat
Aningaasaateqarfimmi siulersuisussat Naalakkersuisunit maanna toqqarneqarput.
Anne Schurmann siulersuisuni siulittaasunngorpoq. Taanna juumuujuvoq, taassumalu aallartinnissani qilanaaraa.
AAMMA ATUARUK Angajoqqaanngorlaat sulinngiffeqarnerat pitsanngorsarniaraa
- Meerartaarnermut atatillugu sulinngiffeqarnermut aningaasaateqarfimmi sulinissarput qilanaaraarput. Ingerlasinnaasumik piaartumik allattoqarfeqalernissarput angorusupparput, taassumalu suleqatiginissaa qilanaaraarput, siulittaasoq tusagassiuutinut nalunaarummi oqarpoq.
Siulersuisunut ilaasortat suliffeqarfeqarfimmi illuatungeriit innersuussinerata kingornatigut toqqarneqarput.
Else Jonna Villadsen aamma Jacob G. Motzfeldt SIK-imit innersuussinermit toqqarneqarput. Karsten Lyberth-Klausen aamma Astrid Spring Öberg Sulisitsisunit innersuussineq kiisalu Anne Schurmann AK-mit, IMAK-imit PPK-miillu innersuussineq aallaavigalugit toqqarneqarlutik.
