Angajoqqaanngorlaat sulinngiffeqarnerat pitsanngorsarniaraa

Inatsisartunut qineqqusaartoq Muté B. Egede inoorlaat inuunertik toqqissisimasumik ajornannginnerusumillu aallartinnissaannut iliuusissanik sisamanik siunnersuuteqarpoq.

Siullermik angajoqqaanngortut sulinngiffeqarnerminni assigiimmik akissarsiaqarnissaannut aningaasaateqarfimmik puilersitsinissaq kissaatigaa, aappaattullu ataatanngortunut immikkut sulinngiffeqartitsisalerusulluni. Pingajuattut Inatsisartut suliffeqarfinnik suleqateqarlutik ilaqutariinnut politikkiliortikkusuppai, sisamaattullu ernereernermi sulinngiffeqarneq sapaatit akunnerinik qulinik sivitsortikkusuppaa.

AAMMA ATUARUK Angajoqqaanngorlaat atugaasa pitsaanerulernissaat IA-kkut kissaatigaat

Siunnersuutilli ilaat aningaasartuutaassasut, Muté B. Egedep oqaatigaa.

- Sulinngiffeqartarnerit sivitsornerini, aammalu ataataasut sulinngiffeqartarnissaannik periarfissiineq aap, piffissaq qaninnerusoq eqqarsaatigalugu aningaasartuutaasussaavoq, Muté B. Egede oqarpoq.

Siunnersuutillu qanoq aningaasalersorneqarnissaat maanna oqaatigerusunngilaa. Siunnersuutigisani aalajangiusimavai.

- Inuiaqatigiit peqqissut pilersitsinissaat siunissamut aningaasaliineruvoq, Muté B. Egede oqarpoq.