Angajoqqaanngorlaat atugaasa pitsaanerulernissaat IA-kkut kissaatigaat

Nunatsinni ilaqutariit meerartalliit atugaasa pitsaanerulernissaat, IA-kkut kissaatigaat. Taamaattumik ilaatigut angajoqqaanngorlaat sulinngiffeqartarnerat pitsanngorsarniarlugu politikerit qanoq peqatasinnaanerannik Naalakkersuisut nassuiaasiussasut, partiip siulittaasuata siunnersuutigaa.
Sara Olsvig Inuit Ataqatigiit
Assi © : KNR / Paarnaq Hansen
Allattoq Thomas Munk Veirum
oktobarip 17-at 2016 16:22
Nutserisoq Jens Thorin

Nunatsinni inuit meeqqiornerusariqarput, taamaammallu ilaqutariit atugaat qulaajarneqartariqarput. IA-p siulittaasua Sara Olsvig taama isumaqarpoq.

Inuit Ataqatigiit siulittaasuata Sara Olsvip, nunat avannarlernut sanilliullugu nunatsinni meerartaarnermi  sulinngiffeqartarnerup pitsaannginnerunera, tamannalu siunissaq eqqarsaatigalugu utoqqaat amerliartuinnartussaammata sulisussallu ikiliartuinnartussaallutik pitsaanngitsuusoq, siunnersuummini maluginiarpaa.

Taamaattumik IA-kkut kissaatigaat, ilaatigut meerartaarnermi aningaasaateqarfiliornissamut periarfissaqarnersoq Naalakkersuisut nassuiaasiussasut, partii 2013-imi taama ittumik siunnersuuteqarpoq - taamanikkut itigartinneqartumik, sulisoqarnermi illua tungeriit isumaqatigiinniarsinnaatitaanerat innersuussutigalugu.

Nassuiaasiornissarli naalakkeersuisooqatigiit tapersersorsinnaavaat.

- Immaqa nunat avannarliit ilinniarfigineqarsinnaapput, ilisimaneqarpormi nunani avannalerni aamma ineriartorneq taama isikkoqarmat, tassa utoqqaat amerliartorput sulisinnaasullu  ikiliartorlutik,  Vittus Qujaukitsoq sulisoqarnermi Naaakkersuisoq  siunnersuummut akissuteqarluni oqarpoq.

Partiit tamarmik oqaaseqartartuisa  Sara Olsvigp siunnersuutaa pitsaasutut nalilerpaat;

- Nuannaarutigaarput siunnersuuteqartup siunnersuut saqqummiummagu, Siumumeersoq Suka K. Frederiksen ilaatigut oqarpoq.

Taassuma ilaqutariit meerartallit sivikinnerusumik sulisinnaanissaat sulinerulluunniit eqaannerusumik  piffissalersorneqarsinnaanera aamma kissaatigaa, ilaqutariit meeqqanik meeqqerivimmut aallertarnermi  tunniussisarnermilu pitsaanerusumik atugassaqaqqullugit.

Partiit tamarmiusut nassuiaasiortoqarnissaa taperserpaat, siunnersuullu sulisoqarnermut ataatsimiisitamut ingerlatseqqillugu.

Nunatsinni ernisimalluni sulinngiffeqartarneq

Ernisimalluni sulingiffeqarsinnaatitaaneq inatsisikkut qulakkiigaavoq, sulinermik inuussutissarsiuteqartunut makkua minnerpaamik pisinnaatitaaffiullutik:

  • Anaanaasoq erninissi sapaatit akunneranik marlunnik sioqqullugu aamma ernereernermi sapaatit akunnerini 15-ini sulinngiffeqarsinnaatitaavoq (arnaq amerlanerisunilluunniit merartaaaruni sapaatit akunnerini 19-ini)
  • Ataataasoq ernereernermi sapaatit akunnerini siullerni 15-ini/19-ini sapaatit akunnerini pingasuni sulinngiffeqarsinnaatitaavoq.
  • Angajoqqqaat ernisimalluni sulinngiffeqareerneq siulleq sapaatit akunnerannik 15-inik/19-inik sivisussusilik uigullugu sapaatit akunnerini 17-inik sulinngiffeqarsinnaapput

Najooqutaq: INaartunermi, erninermi meeravissiartaarnermilu sulinngiffeqartarneq ullormusiaqartarnerlu pillugit Inatsit nr. 14, 7. december 2009-imeersoq

 

Danmarkimi ernisimalluni sulinngiffeqartarneq

Aamma Danmarkimi ernisimalluni sulinngiffeqarsinnaatitaaneq ilatsisitigut aaqqissussaavoq, sulinermillu inuussutissarsiuteqartut minnerpaamik  pisinnaatitaaffini angajoqqaat sivisunipilussuarmik sunginngiffeqarsinnaapput.

  • Anaanaasoq naartunermi sapaatit akunnerini sisamani ernereernermilu sapaatit akunnerini 14-ini sulinngiffeqarsinnaavoq.
  • Angajoqqaat ernereernermi sapaatit akunnerini marlunni maliinnartuni sulinngiffeqaqatigiissinnaapput.
  • Angajoqqaatut sulinngiffeqarnissamik periarfissaq sapaatit akunnerinik 32-nik sivisussusilik, angajoqqaat avissinnaasaat. Sulinngiffeqarneq taanna sapaatit akunnerinut 40-nut sivitsorneqarsinnaavoq.

Najoqqutaq: Ernereernermi sulinngiffeqartarneq ullormusiaqarnerlu pillugit inatsuimmik nalunaarut

Aamma atuaruk