Meerarpassuit nakkutigisaanngitsumik paarineqartarallassapput

- Kommunit una susassaqarfigigaat soorunami ilisimavara, kisianni Inatsisartut peqqussutaanniuna qulakkeerinninniartunga piffissaliussamik aalajangersimasumik allatsitsillunga ersarissumik. Qularinngilluinnaraluarpara kommunit suliatik sapinngisartik tamaat naammassisaraat, aamma taanna uparuartorniarlugu siunnersuutiginngilara. Taamaallaat uani ersarissaatikkusuppakka qanoq sivisutigisumik utaqqinissaq pissusissamisoornersoq, Demokraatit sinnerlugit inatsisartunut ilaasortaq Andreas Uldum taama oqarpoq.

Meeqqerivinnut inissamik utaqqisarnerup sivikillisarneqarnissaa pillugu siunnersuusiornermini Nuummi pissutsit atuuttut taassuma ilaatigut assersuutigai, tamaani ukiup aappaata qeqqa tikillugu utaqqisoqarsinnaasarmat.

Naalakkersuisut siunnersuummi anguniakkat tunngaviusumik isumaqatigaat, sanaartugassanulli ingerlatsinermullu ulluunerani perorsaanikkut neqeroorutinut aningaasartuutissat kommunit akisussaaffigimmassuk, aalajangiiffigisassatut siunnersuutip akuersissutigineqannginnissaa, Naalakkersuisut inassutigaat.

- Kommunip isumagisassaraa, Naalakkersuisullu siunnersuusiorpata, kommunit isumaqalersinnaassapput aamma aningaasalersuiniartugut, Ilinniartitaanermut naalakkersuisoq, Palle Christiansen, ulluunerani paaqqinnittarfinnik aamma akisussaasuusoq oqarpoq.

- Meeqqerivinnut utaqqisarnerup qaammatinik aalajangersimasunik sivisussusuilerneqarsinnaanissaa eqqarsaatersuutigineqassappat, taava ajornartorsiutip annertussusaa Naalakkersuisut misissoqqaassagaat, Palle Christiansen oqarpoq.

Siunnersuut Inatsisartuni ullumi siullermeerneqarmat Kattusseqatigiit Partiiat Demokraatillu kisimik tapersersuipput.