Kujallermi sulisoq pujortaqqusaanngitsoq: Meeraanngilanga

Narsami innarluutilinnut sammisassaqartitsivimmi sulisup sulinermi nalaani unillatsiarnermini pujortaqqusaajunnaarnini akerleralugu soraarniuteqarsimagaluarpoq.

Sulinerummi nalaani eqqissilluni siornatigut pujortartaluarpoq. Isertorlunili pujortartalersimavoq.

- Uanga oqassaanga meeraanginnama akuerisinnaangilara qulaaninngaaaniit taamak pineqassallunga, Bodil Mikaelsen KNR-imut oqarpoq.

Kommune Kujallermi sulisut 1000-it missaanniipput. Kommunimilu januaarip aallaqqaataanit pujortaqqusiunnaarneq sulisunut 500-nut atuuppoq. 

- Inuppassuit eqqorneqarput, kommuunip suliffeqarfiutaanni sulisut. Allaat silami sulisut. Pigaluaqaaq silami sulisut pujortaqqusaangitsut, Bodil Mikaelsen oqarpoq.

Atassut: Pisinnaatitaaffik unioqqutinneqarpoq

Kommune Kujallermi kommunalbestyrelsimut ilaasortap Bentiaraq Ottosenip pujortaqqusiunnaarnermik akerliusut paasisinnaalluarpai.

Kommuunitsinni sulisut akornanni akerliusut paasisinnaalluaqaakka. Aamma soorunami qaqittaqattaarniarpakka taakua, Bentiaraq Ottosen, Atassummi ilaasortaq, KNR-imi oqarpoq.

Bentiaraq Ottosen pujortaqqusiunnaarnermik siunnersuut siorna akuersissutigineqarmat akerliulluni taasivoq.

-Uani eqqarsaatigisariaqarparput inuit pisinnaatsitaaffii siulliuttariaqarput kommuunitsinni. Taamaammat una pujortaqqusinnginneq tassuunatigut akerlilersimavara.

Pujortaqqusiunnaarsimanerlu kommunalbestyrelsimi arlaatigut qaqilerniassallugu Bentiaraq Ottosen pilersaaruteqarpoq.

-Inuit pisinnaatsitaaffiinik aqutsiniarnertut taallugu tikkuaqattaasamaarpara, Bentiaraq Ottosen oqarpoq.

Kommune Kujallermi sulinerup nalaani pujortaqqusiunnaarneq allamik aaliangertoqartinnagu allanngortinneqassamaanngitsoq, kommuunip qullersaqarfianiit ilisimatinneqarpugut.

Tamanna pillugu borgmester Kiista P. Isaksen ippassaq napparsimammat oqaaseqartissinnaanngilarput.

AAMMA ATUARUK Rygeforbud kan sprede sig