Meeraanermini misileraataasimasoq: Mette Frederiksen nunatsinnukarluni utoqqatseriartorsinnaavoq
- Takorusukkaatigut ajunngilaq. Kisianni tamatta Danmarkimi najugaqarpugut. Taamaammat Kalaallit Nunaannut nassassavaatigut? Taamaaliorsinnaavoq, 76-inik ukiulik, Kristine Heinesen qungujularpalulluni oqarpoq.
Ministeriunerup, Mette Frederiksenip meeqqanut nunatsinnit Danmarkimut misileraataasumik 1951-imi aallartinneqarsimasunut nunatsinnukarluni oqaatsitigut utoqqatseriartorniarnerminik sapaatip akunnerata matumani oqaaseqarnera pillugu taanna oqarpoq.
Ministeriuneq allakkatigut ukioq ataaseq matuma siorna utoqqatsissuteqareernikuuvoq.
Ministeriunerup naalakkersuisut siulittaasuat nunatsinnukarluni utoqqatseriartornissaminik pilersaarusiornissaq pillugu attaveqarfigigaa Folketingimi marlunngormat apeqqarissaartoqarneranut atatillugu saqqummerpoq.
Isigaluta oqaaseqarnissaa eqqortoorpasippoq
Meeqqanit misileraataasimasunit 22-nit arfinillit ullumikkut suli uumapput.
Kristine Heinesen taakku ilagaat. Taassuma Mette Frederiksen qaaqqusissappat timmisartumut billetsisineqarnissani qujarutiginiarpaa.
- Aap, soorunami. Tamannami aamma amigaataavoq. Allagaqarnera ajunngilaq, kisianni aamma isigaluta utoqqatsissuteqartariaqarsoraara.
Meeqqat misileraataasut
Meeqqat 22-t misileraataasumit nunatsinnit Danmarkimut 1951-imi aallartinneqarput.
Taakku ineriartortitsiniarnermut misileraanermi qitiusimapput, meeqqat danskiunerulernissaat nunatsinnullu uterunik maligassiusunngornissaat anguniagaasimavoq.
Meeqqalli angerlaramik oqaatsitik puiorsimavaat ilaquttaminnilu najugaqarsinnaatinneqaratik Nuummi meeqqat angerlarsimaffiannut inissinneqarput.
Meeqqanit taakkunannga 22-nit arfinillit suli uumapput. Taakkulu 80-it missaannik ukioqarlutik.
Sooruna?
- Tassami naleqqutissaaq. Allagaqarluni utoqqatsertoqarsinnaajuaannarpoq. Kisianni toqqarluta oqarnissaa tamanna eqqortuusoraara.
Tamanna ilinnut qanoq isumaqassava?
- Aap, tassa utoqqatsernini ilumoorissimassavaa isitsigullu isigaluta. Soorlu nukappiaqqanut Godhavnimiissimasunut taamaaliortoq.
Taamaammat taamaattoqarnissaa neriuutigivat?
- Aggersaanissaa toqqarlutalu oqaaseqarnissaa, Kristine Heinesen oqarpoq.
Taarsiissuteqarneq inerniliissasoq
Taassuma utoqqatsissuteqartoqarnera aningaasanik malitseqarnissaa aamma neriuutigaa.
Eqqartuussissuserisup meeqqanut misileraataasimasunut sinneruttunut arfinilinnut taarsiissuteqarnissaq anguniarlugu naalagaaffik eqqartuussivitsigoortitsoqarsinnaanersoq maanna misissuleruttorpaa.
Tamannalu iluatsissappat tamanna Kristine Heinesenimut isumaqangaatsiassaaq.
- Aap, suliap inerneqarneranik isumaqassaaq. Matuinneqarluni.
Sooruna tamanna ilinnut pingaaruteqartoq?
- Tassa ukiorpassuarni pisimasut taakku nassuiaatiginiarnerat sakkortunikuuvoq. Pissutsit assigiinngitsut eqqaaneqarput tamannalu pillugu ilaquttat oqaloqatigineqarlutik. Sakkortunikuuvoq.
Danskit naalagaaffiata meeqqanut misileraataanikuusimasunut sinneruttunut taarsiissuteqarnissaq maannamut itigartitsissutiginikuuaa.
- Kukkussutaanikuusimasumut utoqqatsissuteqarnissaq qitiuvoq, utoqqatsissuteqarnikkullu pisimasut kukkussutigineqartut ilinniarfigaagut taamalu pisoqaqqissanani, danskit nunamut imminermut ministeriat, Astrif Krag ministeriunerup utoqqatserneratigut qaammatit tallimat qaangiuttut oqarpoq.