Meeraalluni misiliutaasimasoq: Kalaallit Nunaat aamma utoqqatsertariaqarpoq
- Taama isumaqavippunga, neriuppungalu sapaatip akunnerata tulliani Nuummi taamaaliorumaartut, tappavunngassaanga utoqqatsissanersut tusariartorlugu.
Helene Thiesen, meeraallutik misiliutaasimasut suli inuusut arfinillit ilaat, taama oqarpoq.
Danskit ministeriunerat Mette Frederiksen (S) ullumerpiaq taanna meeraallutillu misiliutigineqarsimasunik taaneqartartut allat 21-t oqaatsitigut utoqqatserfigai. Massakkullu Helene Thiesen neriuppoq aamma Namminersorlutik Oqartussat taamaaliussasut.
Meeraallutik misiliutigineqartut
Meeqqat 22-t 1951-imi misiliutaasussatut Kalaallit Nunaanniit Danmarkimut nassiunneqarput.
Meeqqat taakkua misileraanermi pingaarnertut inissisimapput, taamani meeqqat qallunaanngorsarneqarput maligassatut Kalaallit Nunaannut utersinnaaqqullugit.
Taakkuali angerlaramik kalaallisut oqalussinnaanngillat ilaquttaminnilu najugaqaqqusaanatik. Meeqqallu taamani Nuummi børnehjemmimi inissinneqarlutik.
Meeqqat 22-t sinneri arfinillit ullumi suli inuupput. Taakkua 80-it missaannik ukioqarput.
Tassami sapaatip akunnerata tulliani Mette Frederiksen-ip meeraallutik misiliutaasimasunut 22-nut utoqqatserneq Nuummi malunnartinniassavaa. Aaqqissuussineq Katuami marlunngorpat nal. 12 ingerlanneqassaaq. Formanden for Naalakkersuisut siulittaasuata peqataanissaa ilimanarpoq, soorlu aamma Københavnimi taamaaliortoq.
Naalakkersuisut utoqqatsernissartik siornatigut itigartitsissutigereerpaat
Danskit naalakkersuisui 2020-mi allakkatigut meeraallutik misiliutaasimasunut utoqqatsermata oqallisaalerpoq aamma Kalaallit Nunaat akisussaaffimmik tiguseqataassannginnersoq utoqqatserlunilu. Pisunimmi nalunaajaanermi takuneqarsinnaavoq Kalaallit Nunaata landsrådia misiliummik tapersersuisimasoq – ilasortanit 23-nit 19-it akuersipput.
Kisianni taamani Naalakkersuisuusut Kim Kielsen (S) siuttoralugu Naalakkersuisut meeqqanut misiliutaasunut Landsrådip akisussaaffia utoqqatsissutigisinnaanagu.
Tamannalu massakkut aamma qaqeqqinneqarpoq danskit ministeriunerat saallugit kiinarsillugit oqaaseq utoqqatserpugut taammagu – Múte B. Egede aamma taamaaliussava?
Utoqqatserpugut
Helene Thiesen isumaqarpoq pissusissamisoorluinnartoq Naalakkersuisut siulittaasuat Namminersorlutik Oqartussat sinnerlugit kalaallit nunataanni oqassappat "Utoqqatserpugut".
Københavnimi utoqqatsernermik aaqqissuussinermi peqataaqqammerpoq Nuummukassallunilu tassani utoqqatsernermik aaqqissuussamut peqataajartorluni.
- Tallimanngorpat Nuummut inunngorfigisannut aallassaanga, angerlarsimaffinniillunga Mette Frederiksenip tikinnissaanut ilaassalluni iluassaaq. Tassani tamarmi aallartippoq, tassanilu naammassissalluni, oqarpoq.
Pingasunngornermi KNR-ip Múte B. Egede Danmarkimi naapimmagu, nammineq Kalaallit Nunaata aamma utoqqatsernissaanik apeqqut naammattoorpaa. Erseqqissumilli akissuteqanngilaq.
- Siullermik pingaarnermillu taamani naalagaaffik suliniartuuvoq, tassalu utoqqatsissut tusagarput pissusissamisoorpoq. Kisianni aamma uanga utoqqatserpunga Namminersornerullutik Oqartussaaneq aamma Namminersorlutik Oqartussaaneq atulermatali tatisisimannginnatta, tamannami siusinnerujussuakkut pisinnaagaluarpoq, tassami taakku (meeraallutik misiliutaasimasut) taamaaliorfigineqartariaqaramik, KNR-imut oqarpoq.
- Pisunut akuerineqarsinnaanngitsunut utoqqatserniminnguaq ukiuni 70-ini utaqqisariaqanngikkaluarpaat.
