Meeqqerivinni perorsaasunik amigaateqartoqarnera akerliussutsimik takutitsinissamik kinguneqartitsivoq
Paamiuni meeqqerivinni perorsaasut amigaataapput, meeqqerivinnilu perorsaasut ikippallaarneri peqqutigalugit sineriak tamakkerlugu akerliussutsimik takutitsisoqalerpoq. Akerliussutsimik takutitsinermi aaqqissuisoq Ulunnguaq Rosbach KNR-imut taama oqarpoq.
Allattoq Jonna Enoksen Dahl
oktobarip 05-at 2026 07:30
Perorsaasunik amigaateqarneq Paamiuni meeraaqqerivimmi Meerarmi takornartaanngilaq.
Paamiuni meeraaqqerivik Meerarmi sulisussaaleqineq peqqutigalugu meeqqat ilaat meeqqanukaanneqaraluartut angerlarteqqiinnarneqartarput.
Meerarmi marlunnik meeqqaniittuutillip Ketty M. Daneielsenip tamanna nalaassimavaa.
-Sulisoq ataaseq naatsorsuutigisaagami meeqqat arfinillit kisimik paarissagai, tassani sulisoq ataasiinnaasimagaangat meeqqanukaassigaluarluta arfinilinngoreersimappata iseqqusaaaneq ajorpugut ingerlaqqiinnartariaqartarlutalu.
Meeqqanut suli atualinngitsunut perorsaanikkut inerikkiartuutaasunik ulluunerani neqeroorutit pillugit Inatsisartut Inatsisaat naapertorlugu, meeraaqqerivinni eqimattat amerlanerpaamik aqqaneq marlunnik meerartaqassapput. Ulluunerani paaqqinnittarfiup ammasarfiini meeqqani eqimattani tamani sulisut ikinnerpaamik marluussapput, pinerillu tamaasa ulluunerani paaqqinnittarfimmi perorsaasoq ikinnerpaamik ataaseq sulissalluni.
Ketty M. Danielsen ullaakkut meeqqerivimmut angumersiniaalluni meeqqani meeqqanukaattarpai, tamannalu meeraanut aamma sunniuteqarpoq.
-Meeqqat piuminaattarneri malunnartarpoq, meeqqanukaassigaluarlunilu iseqqusaannginneq paasiuminaappasittarpoq sooruna? Ketty M. Danielsen oqarpoq nangillunilu:
-Meeqqaniissimagunik, meeqqat taakkuullutik sulisullu amigarlutik, ilaanni aasarpagut qasoqqasut isumaluttullu.
Suliffeqarfimmut kalluaasoq
Ketty M. Danielsen kigutileriffimmi sulisuuvoq, tamannalu meeqqaminik meeqqerivimmut tunniussinissamut angumersinngikkaangami suliffianut kinguneqartarpoq.
-Kigutileriffimmi sulivunga, kigutilerisorlu marluinnaanitsinni ikiortissaqanngimmat suliffipput matuunnartariaqartarpoq.
Ketty M. Danielsen sulitilluni meeraaqqerivimmiit ilaanneeriarlunilu sianerfigitittarpoq meeqqani aasaariaqarai imaluunniit aajaartariaqarai meeraaqqerivik sulisukippallaarmat.
Meeraaqqerivik Meerarmi meeqqat arfiniliinnaat ullut ilaannik parisinnaasaritik, meeqqallu ulloq taanna meeraqqerivimmiittussaagaluartut allat angerlaqquinnartariaqartaritik, pisortaagallartup Ruth Joelsenip KNR-imut uppernarsarpaa.
Meeraaqqerivimmi sulisussaaleqineq tamatumunnga peqqutaasoq taanna oqarpoq.
Sulisussaaleqisoqarnera peqqutigalugu Nuumminngaanniit perorsaasumik ataatsimik qaammat ataaseq sulisussamik tikisitsisoqartoq, saniatigullu perorsaanermik siunnersortimik suliartortoqartoq Kommuneqarfik Sermersuup uppernarsarpaa.
Akerliussutsimik takutitsisoqarniartoq
Ulunnguaq Rosbach isumaginninnermi ikiortitut ilinniarsimasuuvoq, meeqqerivinnilu assigiinngitsuni ukiuni 26-ni sulisarluni.
Nuummi angajoqqaat meeqqerivimmiittuutillit meeqqerivinni perorsaasunik ilinniarsimasunik amigaateqarneq pillugu Nuummi apriilimi akerliussutsimik takutitsipput, Ulunnguaq Rosbachilu tassani peqataavoq.
Ulunnguaq Rosbachillu meeqqerivinni perorsaasut akerliussutsimik takutitseqqinnissaat massakkut pilersaarusiorpaa.
-Piffissanngorsorivara uagut sulisut aamma tusaaneqartariaqartugut. Angajoqqaat akerliussutsimik takutitsereerput, taava uagut sulisut taamaalilluta aamma qisuariarnissarput pingaartupilussuuvoq.
Illoqarfiit sisamat akerliussutsimik takutitsilersut
Qaqortumi, Uummannami, Ilulissani Nuummilu meeqqerivinni peqqissaasut akerliussutsimik takutitsiniarlutik maannamut nalunaarsimapput.
Meeqqeriviit inuiaqatigiinni pingaarnerpaatut inissisimasut Ulunnguaq Rosbach isumaqarpoq.
-Meeqqeriviit matuneqassagaluarpata sapaatip akunnera inuiaqatigiinni sullissineq unittussaavoq, tassa taama nunatsinni meeqqeriveqarniarneq pingaaruteqartigivoq sumiluunniit nunarsuatsinniluunniit taama oqaannaraanni.
Meeqqeriviit ilaasa sulisussaaleqisoqarnera peqqutigalugu angajoqqaat sianerfigineqartarput meeqqatik aasariaqaraat, tamannalu akuerineqarsinnaanngitsoq Ulunnguaq Rosbach isumaqarpoq.
-Ajuusaarnarpoq taanna aallertitsineq. Angajoqqaat nalunngilagut uagutsituulli sulisuusut, atorfissaqartinneqarput suliffimminni, taamaammat inuiaqatigiinni uagut meeqqerivimminngaanniit eqquisaqattaarnissarput taanna pinaveersaarniarutsigu iliuuseqartoqartariaqarpoq.
Meeqqeriviit matugallarnissaat kissaatigigaa
Akerliussutsimi takutitsinermi meeqqeriviit matugallarneqarnissaat Ulunnguaq Rosbachip kissaatigaa.
-Ullorluunniit ataaseq meeqqeriviit matoqqatillugit akerliussutsimik takutitsilluta. Ullaarnganiit pisinnaavoq, taava meeqqeriviit ullup qeqqanut ammarneqarlutik, uanga taanna eqqarsaatigilluinnaqqissaarpara. Taamatut iliuuseqartoqaraluarpat immaqa meeqqeriviit qanoq pingaaruteqartigineri aatsaat inunninngaanniit immaqalu Naalakkersuisuninngaanniit paasineqassagaluarpoq.
Akerliussutsimik takutitsinerup saniatigut Ulunnguaq Rosbach atsiornernik katersiniarpoq, tassani meeqqerivinni sulisut atsiorneri katersorniarpai.
Peqqissaasutut sulisut sulinerminni atugassarititaat sulisuniit naammagineqanngitsoq atsiornernik katersuinermini takutikkusuppaa.
Akerliussutsimik takutitsinissaq suli ullulerneqanngilaq, Ulunnguaq Rosbachilli oktobarimi akerliussutsimik takutitsisoqarnissaa neriuutigalugu oqaatigaa.
