Meeqqat sumiginnakkat pillugit nalunaarusiaq: Isumaginnittoqarfiup kisimiilluni suliassaq isumagisinnaanngilaa
Meeqqat sumiginnagaanerannut innarlerneqarnermikkullu kingunerlutsitsinerannut peqqutaasut tassungalu pissutsit assigiinngitsut ataqatigiissut pillugit Kommuneqarfik Sermersooq nalunaarusiortitsivoq.
Tarnip pissusaanik ilisimasalik Heidi Lindholm aamma tarnip nappaataanut nakorsaq Jacob Lindholm nalunaarusiamik suliarinnittuupput.
- Ilisimasanik aalajangiisartut atorsinnaasassaannik ilanngussisalluta neriuutigaarput, Jacob Lindholm oqarpoq.
Pissutsit aqqanillit
- Angajoqqaajusinnaanerup annikillinera
- Tarnikkut qajannarneq
- Kinguaasiuutitigut innarlerneqarneq
- Nakuuserneq
- Ikiaroornartunik atornerluineq
- Imminut toqunneq, ajunaarnerit toqutsinerillu
- Ineqarnikkut ajornartorsiutit
- Suliffeqarneq aningaasaqarnerlu
- Nunassittarnerup pissusia inuiaqatigiinnilu pissutsit
- Pisortanit neqeroorutit aaqqissuunneri
- Nunasiaataanerup kingunerisaanik piorsarsimassuseq
Pissutsit assigiinngitsorpassuit meeqqat atugarissaarnissaannut pingaaruteqarnerat nalunaarusiap pingaarnersarigaa taassuma oqaatigaa.
Meeqqat sumiginnagaanerannut innarlerneqarnermikkullu kingunerlutsitsinerannut pissutsit assigiingitsut ataqatigiissut pingaarnerit aqqanillit aamma ajornartorsiutit kinguaariinnut tullernut qanoq ingerlateqqinneqartarnerat nalunaarusiami allaaseerineqarput.
Pissutsit ilaat ataaseq tassaavoq pitsaanngitsunik ineqarneq. Tassa ajunngitsumik ineqanngikkaanni angerlarsimaffimmi inersimasunut meeqqanullu atugarliornermik kinguneqarsinnaanera qaninnerusarpoq. Tassalu pitsaanngitsumik ineqarnerup kinguaassiuutitigut innarlerneqarnermik, nakuusernermik aamma atornerluinermik nalaataqarnissaq qaninnerulersittarpaat, tamaklkulu meeqqat atugarliornerannik kinguneqartarpoq.
Suliffeqannginnerup aarlerinartoqarnera annertusisittarpaa
Suliffeqannginneq pissutsit ilagaat ajornartorsiuteqalernissamut aarlerinartoqarneranik sakkortusisitsisinnaasoq annertusisitsisinnaasorluunniit. Ataatsimut isigalugu meeqqat tarnikkut ineriartornerat ilikkariartornerallu pissutsit taakku ajornakusoornerulersittarpaat. Taavalu ajornartorsiutit akuttunngitsumik kinguaariinnut tullernut ingerlaqqittarput, tassami meeraanermi toqqissisimanngitsuusimagaanni inersimalerlunilu meeraqaleraanni angajoqqaajuneq ajornakusoorsinnaasarpoq.
Pissutsit taakku aqqanillit tamarmik imminnut ataqatigiinnerat sakkortusaaqatigiinnerallu ajornartorsiutit aaqqikkuminaannerannut peqqutaasutut nalunaarusiami nassuiaatigineqarpoq. Taamaattumik nalunaarusiamik allattut taakku marluk isumaqarput ajornartorsiutinik aaqqiiniaraanni ataqatigiissumik suliniuteqartoqartariaqartoq.
AAMMA ATUARUK Kommuneqarfik Sermersuup Danmarkimut kissaatigai
- Soorlu nalunaarusiami arlaleriarluta allattugut oqariartuutitta pingaarnersaraat meeqqat inersimasullu atugarissaarnissaannut pissutsit amerlaqisut pingaarutaasut, Jacob Lindholm oqarpoq.
- Tarnikkut nappaataannaanngilaq imaluunniit atornerluinermik peqquteqarluni akornartorsiutaannnaanani. Akuttunngitsumik tassaasarpoq tarnikkut innarlerneqarnissamut qanittuuneq, atornerluinermik ajornartorsiuteqarneq, nakuuserneq, ineqarnermi ajornartorsiuteqarneq, aningaasaqarnikkut ajornartorsiuteqarneq, suliffeqarnermut attaveqarluannginneq ilaalu ilanngullugit, Jacob Lindholm oqarpoq.
Paasisaqartitsinerunissaq neriuutigaat
Taamaattumik oqallinnerup isumaginninnerinnarmut sammitinneqarnera iluaqutaanngilaq, Heidi Lindholm erseqqissaavoq.
- Oqallinnermimi allatigullu isumaginninnermut tunngasut ukkatarineqarnerugajuttarmata. Isuginninnermut tunngasut kisimik ajornartorsiutaanngillat. Arlalissuupput, oqarpoq.
Kommunimi politikerit ajornartorsiutinut paasinnilluarnerulernissaat nalunaarusiap kingunerissagaa Kommuneqarfik Sermersuumi Meeqqanut Ilaqutariinnullu Ingerlatsivimmi pisortaq Martha Lund Olsen neriuppoq.
