Meeqqat siunissaat pillugu aaqqiissoqartariaqarsoraa

Perorsaasut amigaatigineqarnerat inuiaqatigiinni ajornartorsiuterujussuuvoq. Akissarsianut tunngaannarani meeqqalli siunissaannut annertuumik sunniuteqarpoq, taamaattumillu meeqqeriviit siunissami qanoq aaqqissuunneqarnissaat pillugu nakimaatsumik aalajangiisoqartariaqartoq perorsaasunngorniat ilinniarfianni pisortaagallartoq Henriettet Frederiksen isumaqarpoq.

Meeqqerivimmi inimi ataatsimi pinngitsoorani ilinniarsimasumik perorsaasoqartussaavoq, kommuninili pingaartumik anginerni perorsaasussaaleqineq ima annertutigaaq meeqqeriviit ilaanni pisortaq kisimi iliniarsimasuusarluni. Pissutsit taamaannerat attanneqarsinnaanngilaq, Perorsaasut Ilinniarfianni pisortaagallartoq Henriette Frederiksen isumaqarpoq. Atuarfitsialak piinnarnagu aammali meeqqerivitsialaat piareersarneqartariaqalersorai.

Perorsaasutut ilinniarsiamasut 100-t sinneqartut atuarfinni mikinernut ilinniartitsisunngortarput. Ilinniartitsisut perorsaasullu akisarsiaasa assigiinngissutaat qaammammut 5000 kr.-t missiliorpaat. Atuanngiffeqartarnerit sulinermilu atugassarititaasut allat eqqarsaatigalugit atuarfinni sulineq taamaakkami meeqqerivinni sulinermiit orniginarnerujussuuvoq.

Meeqqalli meeqqerivinniittartut tamatumani pilliuteqartuusut Henriette Frederiksen isumaqarpoq.

-Meeqqerivimmi perorsaasoqarnera meeqqat ajunngitsumik sullinneqarnissaannut qularnaveeqqutaasarpoq, perorsaasummi meeqqat ineriartornerannut inuillu pissusilersortarnerannut tunngasunik immikkut ilinniagaqartuupput, taamaattumik perorsaasoqanngikkaangat meeqqap ineriartornermini pissarsiassaraluami ilaat annaasarpai.