Meeqqat qassit angerlarsimaffimmi persuttaasunit eqqugaasarpat

Inatsisartuni ilaasortap Astrid Fleischer Rex-ip aarleqqutigaa kalaallit meerartaat ikinngitsut angerlarsimaffimmi persuttaasunit eqqungaasartut. Maanna ajornartorsiutip qulaajarneqarnissaa piumasaraa.

Danmarkimi meeqqat affaasa anaanamik persuttartinnera isiginnaartarsimagaat, aamma suli amerlanerusut - tassa meeqqat pingasuungaangata marluk - tusarnaartarsimagaat, meeqqanik qimarnguinniittunik qallunaat misissuinerisa paasinarsisippaat. Meeqqat arlallit aamma persuttartittarsimapput.

Inatsisartuni ilaasortaq, Astrid Fleischer Rex, isumaqarpoq, meeqqat nunami maani qimarnguinniittut aamma taama misigisaqartarsimanissaat ilimagisariaqartoq.

Tamannalu tunngavigalugu paragraf 37 najoqqutaralugu apeqquteqaateqarpoq, paaserusullugu meeqqat qimarnguinniittartut immikkut ittumik pisariaqartitsisarnerat Naalakkersuisut iliuuseqarfigilersaarneraat.

Suliniutinik qaqugu aallartitsisoqassanersoq ilanngullugu paaserusuppaa.

Astrid Fleischer Rexip misissuineq taaguutilik ”Inuusuttut inuunerat 2011” innersuussutigaa. Misissuinermi tassani inuusuttuaqqat 15-inik 16-inillu ukiullit peqataaffigisaanni, 38 procentit oqaatigaat, inuunermik ilaani anaanartik ajortumik pineqartoq isiginnaartarsimagitsik. 20 procentit akuttunngitsumik tamanna misigisarpaat.

Politiit angerlarsimaffinni perulluliornernut 2.836-riarlutik 2011-mi aggersarneqarput, taakkunannga 444-t meerartaqarsimapput.

- Meeqqat misigisaat sakkortoorujussuusimapput, pingaaruteqarporlu meeqqamit suliarineqarnissaat. Meeqqat akuttunngitsumik imminnut pisuutittarput - kanngusuttarlutillu, pisariaqartittarpaallu misigisamik oqaasertalernissaat, aamma taama misigisaqartartuni kisimiinnginnamik paasisariaqarpaat, Astrid Fleischer Rex allappoq, ilanngullugulu oqaatigalugu, meeqqat pisariaqartitsinerat tunngavigalugu qimarnguiit ikiorsiisinnaanissaat pingaaruteqartorujussuusoq.

Taassuma qimarnguiit meeqqanut suliniutigisartagaat pillugit Naalakkersuisut 2004-mili apeqquteqaateqarfigereerpai.

Isummersuutit

inatsisartut-sal-sep2019.jpg

Inatsisartut Ukiakkut Ataatsimiinnerat



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat