Meeqqat Illersuisuat nutaamik pilersaarusiornissamik aalajangerneq pillugu: Ulloq pingaaruteqaqaaq
- Ulloq uagutsinnut pingaaruteqaqaaq.
Inatsisartut Naalagaaffiit Peqatigiit (NP) Meeqqat pillugit Isumaqatigiissutaata tamarmiusup nunatsinni tamarmi atuutilernissaanik qulakkeerisussamik iliuusissatut pilersaarusiortoqarnissaanik marlunngornermi akuersereersullu, Meeqqat Illersuisuat, Aviâja Egede Lynge taama oqarpoq.
MIO naapertorlugu Naalagaaffiit Peqatigiit Meeqqat pillugit Isumaqatigiissutaanni immikkoortut uku nunatsinni eqquutitinneqanngillat:
NP-imm. 3: Meeqqat soqutigisaasa ilaatinnissaasa qulakkeernissaat.
NP-imm. 5: Angajoqqaat akisussaaffii.
NP-imm. 6: Meeqqat inuunissaminnut pisinnaatitaaffiat.
NP-imm. 7: Meeqqap nalunaarsorneqarnissamut ateqarnissamullu pisinnaatitaaffia.
NP-imm. 9: Meeqqap, angajoqqaamMinit avissaartitaannginnissamut pisinnaatitaaffia, meeqqamut pitsaanerpaaq eqqarsaatigalugu tamanna pinngippat.
NP-imm. 12: Meeqqamut tunngasutigut tamatigut meeqqap tusaaneqarnissaminut pisinnaatitaaffia.
NP-imm. 18: Pisortat naapertuuttumik angajoqqaanut angajoqqaatullu akisussaatitaasunut naapertuuttumik ikiuinissaminnut pisussaaffiat.
NP-imm. 19: Timikkut tarnikkullu naakuuserfigineqannginnissamut naalliutsinneqannginnissamullu illersorneqarnissaminut meeqqap pisinnaatitaaffia
NP-imm. 20: Angajoqqaaqanngitsut ikiorneqarnissaminnut pisinnaatitaaffiat naalagaaffiit peqataasut (pisortat) meeqqanik angajoqqaaqanngitsunik ikiuissapput.
NP-imm. 24: Meeqqap qaffasinnerpaamik anguneqarsinnaasumik peqqissuunissaanut pisinnaatitaaffeqarnera.
NP-imm. 25: Naalagaaffiit peqataasut (pisortat) meeqqat ulloq unnuarlu angerlarsimaffinni inissinneqarsimasut naafferartumik nakkutigineqarnissaat qulakkiigassaraat.
NP-imm. 26: Inuuniarnikkut ernumanaatsumik inissisimanissaq: Meeraq pisinnaatitaaffeqarpoq inuuniarnikkut ernumananngitsumik inissisimanissaminik.
NP-imm. 27: Meeraq pisinnaatitaaffeqarpoq inuunerminiima inissisimassalluni allaat meeqqap ineriartornissaa qulakkeerneqarsinnaassalluni.
NP-imm. 28: Meeqqap atuartinneqarnissaminut ilinniagaqarnissaminullu pisinnaatitaaffia.
NP-imm. 29: Meeqqap ineriartortuarnissaminut pisinnaatitaaffia.
NP-imm. 30: Meeqqat ikinnerussuteqartuneersut sumiuussusertillu aallaavigalugu kulturiminnik namminnerlu oqaatsiminnik atuinissaminnut pisinnaatitaaffeqarnerat.
NP-imm. 31: Meeqqap sunngiffeqarnissaminut, eqqissisimaarsinnaanissaminut pinnguarnissaminullu pisinnaatitaaffia.
NP-imm. 33: Hashimik imigassamillu atornerluinermut tunngatillugu meeqqap illersorneqarnissaminut pisinnaatitaaffia.
NP-imm. 34: Kinguaassiutitigut kanngutsaatsuliorfigineqarnissamut atornerlugaanissamullu meeqqap illersorneqarnissaminut pisinnaatitaaffia.
NP-imm. 39: Meeqqap ikiorneqarnissaminut pisinnaatitaaffia naalagaaffiit peqataasut (pisortat) meeqqat ikiorneqarsinnaanissaannut pisussaatitaaffiat.
Naalagaaffiit Peqatigiit Meeqqat pillugit Isumaqatigiissutaat nunatta 1993-imi atuutilersippaa, taassumali tamakkiisumik atuutitinneqannginnera ajornartorsiutaavoq. Meeqqat Illersuisuata Aviâja Egede Lyngep oqarnera naapertorlugu isumaqatigiissummi tassani immikkoortuni 54-iusuni 19-it nunatta eqquutitinngilai.
- Isumaqatigiissummi tassani immikkoortuni 54-iusuni 19-it nunatta malinniapiloorai, nunatsinni tamangajammi angalereernitsinni paasivarput. Meeqqat illersorneqarnissaat, ineriartornermut pisinnaatitaaffeqartitaanissaat ataatsimullu isigalugu peqqillutik tatitullutillu alliartonissaat pineqarput, Aviâja Egede Lynge oqarpoq.
AAMMA ATUARUK Meeqqat illersuisuat: Meeqqasi killilersigit - piffissaq ernumanarpoq
Nunatsinni meeqqat inuusuttullu pisinnaatitaaffii tamaasa nunatsinni tamakkiisumik eqquutitinnissaat, aamma meeqqat inuusutullu pitsaasunik atugaqartitaallutik tatitullutillu alliartornermut periarfissaqarnissaat qulakkeerumallugit isumaqatigiissutip tamarmiusup nunatsinni tamarmi atuutilernissaanut iliuusissatut pilersaarusiortoqassaaq.
- Suli inuiaqatigiittut Naalagaaffiit Peqatigiit Meeqqat Pisinnaatitaaffii tamakkiisumik atuutsinnissaasa qulakkeernissaat naammassisimanngilarput. Pisinnaatitaaffiit 54- it tamakkiisumik atuutsinnissaat pillugu suli suliassaqaqaagut, Mikivsuk Thomassen (IA) aalajangiiffigisassatut siunnersuut ukiaq saqqummiunneqarmat oqarpoq.
Kigutinik narlorsaasarneq sipaarniarfigigaat
Iliuusissatut pilersaarut alla siusinnerusukkut akuerineqarpoq. Taanna meeqqat inuusuttullu sumiginnakkat ikinnerulernissaannut tunngavoq, nunatsinnili meeqqat tamarmik pisinnaatitaaffii tassani ilanngunneqaratik. Meeqqat inuusuttullu sumiginnakkat taamaallaat tassani pineqarput.
Isumaqatigiissutip tamarmiusup nunatsinni tamarmi atuutilernissaanut iliuusissatut pilersaarut nutaaq ataatsimiititaliamit tamakkiisumik isumaqataaffigineqarpoq, kisianni Partii Naleraq Suleqatigiissitsisullu ataasiakkaanut tunngasunik isornartorsiuteqarput.
AAMMA ATUARUK Naalakkersuisut Nuummi kigutinik narlorsaasarnerit unitsikkaat
- Meeqqat peqqissutsimut tunngatillugu pisinnaatitaaffii eqquutitissavagut. Meeqqat kigutaannik narlorissaasoqartarunnaassasoq Naalakkersuisut aalajangerpaat. Meeqqat peqqissuunissaat sipaarniarfigissanngilarput, tamanna akuersaarsinnaanngilarput, Partii Naleqqap siulittaasua Hans Enoksen oqarpoq.
- Meeqqanut tunngasut sipaarniarfiginasigit.
Kikkulluunniit tapersersuissasut
Iliuusissatut pilersaarutip allaffinniinnaq suliniutaaginnalernissaa-aasiit Suleqatigiissitsisut siulittaasuata Tillie Martinussenip ernummatigaa.
- Siunnersuut siunertagissaartoq qularnanngilaq. Iluaqutaassappalli tapersersoqatigiittariaqarpugut. Isumaginninnermut aningaasaleeqqittoqartariaqarpoq, Tillie Martinussen oqarpoq.
AAMMA ATUARUK Meeqqat pilersaarusiornermi peqataatinneqartariaqarput
Isumaqatigiissutip tamarmiusup nunatsinni tamarmi atuutilernissaanut iliuusissatut pilersaarut nunatsinni meeqqanut tamanut atuutitinnissaa innuttaasullu peqataanissaat pingaaruteqartoq, Aviâja Egede Lyngep erseqqissarpaa.
- Allannguinissaq najukkani ataasiakkaani innuttaasunit pineqartunillu aamma kissaataalluni.
