Meeqqat illersuisuat: Meeqqasi killilersigit - piffissaq ernumanarpoq

Meeqqasi killilersigit - piffissami ernumanartumiippugut.

Meeqqat Illersuisuat Aviaaja Egede Lynge angajoqqaanut inersimasununullu allanut Facebook aqqutigalugu ullumi kaammattuuteqarpoq.

Taassuma tamanna "angajoqqaanut, inersimasunut allanullu asannittumik kaammattuutaanerarpaa".

- Puiussanngilarput meeqqanut toqqissisimanarnerulertarmat inersimasut ernumanartoqartillugu akisussaaffimmik tigusigaangata, meeqqat illersuisuat allappoq.

AAMMA ATUARUK Meeqqat corona pillugu saaffiginnittut: Aneersinnaavugut?

- Piffissami uani maleruagassat malinneqarnissat tamatsinnut pingaaruteqarluinnarpoq.

- Taamaammat inersimasut qinnuigaassi meeqqasi inuusuttortasilu oqaaqqissaarineq killiliinerlu perorsaanissinni atorluaqqullugu.

Nunatsinni coronaviruseqartut maanna marluupput. Taakku tamarmik Nuummiipput.

Tunillatsissimasup aappaa sumi tunillatsissimanersoq ilisimaneqanngilaq, taamaammat Nuuk matuneqarlunilu mattussisoqavippoq: Atuarfeqarfiit, paaqqinniffiit, naluttarfik, timigissartarfiit matupput. Neriniartarfiit imerniartarfiillu aamma matupput.

Inuit qulinit amerlanerusut ataatsimoornissaat politiinit inerteqqutigineqarpoq.

Illoqarfiit pingaarnersaannit taakungalu timmisartuussinerit tallimanngornermi naljunaaqutaq 23.59-imit sapaatini-akunnerni pingasuni aamma unitsinneqassapput.