Meeqqat illersuisuat Namminersorlutik Oqartussat isornartorsiorpaa
Namminersorlutik Oqartussat akisussaaffigaat meeqqat inuusuttuaqqallu ulloq unnuarlu angerlarsimaffiinnut inissinneqartussat tamarmik inissaqartinnissaat, taamak ersaritsigisumik meeqqat illersuisuat Aaja Chemnitz Larsen oqariartuuteqarpoq.
- Assuarnartorujussuuvoq, nammineerluta meerartatsinnut nunatsinni ulloq unnuarlu angerlarsimaffinnut inissiisinnaannginnerput, Aaja Chemnitz Larsen oqarpoq.
Kommune Kujallermi inunnik isumaginninnermut pisortap Mikkel Ballep Namminersorlutik Oqartussat assuaraa, meeqqanut inuusuttuaqqanullu ulloq unnuarlu angerlarsimaffinnik piareersimasoqannginnera, Kommuni Kujallermi maana piareersimavoq meeqqanik inuusuttuaqqanillu Danmarkimut ulloq unnuarlu angerlarsimaffinnut inuusuttuaqqanik pingasunik aallartitsinissaminut.Taama Kommune Kujalleq oqariartuuteqareersorlu, maanna meeqqat illersuisut AajaChemnitz Larsen Namminersorlutik Oqartussat kigaapallaammik suleriaaseqarneranik assuaraa.
- Ulloq unnuarlu angerlarsimaffiit Namminersorlutik Oqartussanit ullumikkut akisussaaffigineqarput, oqaluuserineqarnikuullunilu siunissami imaasinnaasoq akisussaaffiit kommuninut tunniunneqarnissaat. Isumaga naapertorlugu Naamminersorlutik Oqartussat suliaq uninngatiinarsimavaat, Kommuninut akisussaaffik tunniunneqarnissaanut.
Aaja Chemnitz Larsennip ilanngullugu assuaraa, ulloq unnuarlu angerlarsimaffinnut utaqqisut amerliartortut, Namminersorlutik Oqartussanit pimoorunneralugu suliarineqannginnera.
- Assuarnartutut isigaara, Namminersorlutik Oqartussanit nalunnginneqaraluartoq meeqqanik inuusuttuaqqanillu atugarliortunik ulloq unnuarlu angerlarsimaffinnut inissinneqarnissaminnut utaqqisoqartoq, sooq taava meeqqat inuusuttuaqqallu utaqqisut Namminersorlutik Oqartussanit nungutinniarneqanngillat?
Meeqqat illersuisuata ilanngullugu aamma oqaatigaa, Namminersorlutik Oqartussat sukkasuumik anguniartariaqaraa, meeqqat inuusuttuaqqallu utaqqisut tamarmik inissaqartilernissaat.
- Isumaqarpunga Namminersorlutik Oqartussat iliuuseqartariaqartoq, imannak meeqqat inuusuttuaqqallu ulloq unnuarlu angerlarsimaffinnut inissinneqarnissaminnut utaqqisut tamarmik inissaqartilernissaanik.
