Meeqqat illersugaanerat nukittorsaqqilerpaat

Meeqqanut suli atualinngitsunut perorsaanikkut inerikkiartuutaasunik ulluunerani neqeroorutit pillugit Inatsisartut inatsisaat nutaaq, Inatsisartut isumaqatigiillutik akuersissutigaat. Inatsimmi nutaami januaarip aallaqqaataanni atuutilersussami meeqqat piaartumik iliuuseqarfigineqartarnissaat qulakkeerniarneqarpoq.
Allattoq Elisa Isaksen
novembarip 15-at 2012 09:12

Meeqqat pingasunik ukioqalerneranni peqqissusiannik ineriartornerannillu misissuisarnissani atortussanik Naalakkersuisut inerisaaqqullugit peqquneqarnerat, aamma meeqqat tallimanik ukioqalerneranni atualernissamut piareersimanerannik misissuisarnissap piumasarineqarnera inatsimmi nutaartaavoq.

Meeqqanik taama misissuisoqarlunilu ineriartornerannik uppernarsaatissiortalernissami meeqqerivinni sulisut angajoqqaallu nalilersueqatigiissinnaanngornissaat anguneqassaaq.

Meeqqat inerisimassusaannik allaatiginninnerit meeqqat tamarmik mappiinut inissinneqartassapput meeqqallu atuarfeqarfimmut ikaarsaarnerminni mappitik nassartassavaat.

Misissuinerit aamma meeqqat mappiisa atulernerisigut sapinngisamik siusinaarluni pisariaqalerfiatigullu piaartumik iliuuseqartoqartalernissaa aqqutissiuunneqassaaq.

Inatsit nutaaq kommuninit aamma meeqqanik sullissisut peqatigiiffiinit ilassilluarneqarpoq. Inatsisip aammattaaq aqqutissiuutissavaa meeqqat inuusuttuaqqallu tungaannut suliniuteqarnermi ataqatigiissaarilluarnerulernissaq.