Meeqqat atuarfii: Danskit inuusuttaat nunarput pillugu ilisimasaqarnerulissapput
- Danskit inuusuttaat nunarput pillugu ilisimasakippallaarput. Ilisimaqarnerulernissaannillu suliniuteqarnissap politikkikkut peqataaffiginissaa uannut pingaaruteqarpoq. Ilisimasakippallaarneq kalaallit Danmarkimiittut nunarpullumi pillugit isummanik pigiliussaqartitsilersinnaavoq, Aaja Chemnitz Larsen oqarpoq.
Aaja Chemnitz Larsen danskit inuusuttaasa nunarput pillugu qanoq ilisimasaqartiginerannik misissuititsereerpoq. Danskillu inuusuttaasa meeqqat atuarfianni atuartut ilinniarnertuungorniartullu 50 procentii pallillugit nunarput pillugu ilisimasaqanngiitsut misissuinerup takutippaa.
Ilisimasallillu nunatsinni ullumi pissutsit inooriaaserlu ilisimasaqarfigivallaarnagit qanga inooriaatsinik ilisimasaqarajuttuusarput.
- Apeqqutigineqakkajupput: Illuikkanik najugaqarpisi? Puisituinnaavittarpisi? Tamanna akunnattoornarpoq. Danskit inuusutttaasa ilisimaqarnerulernissaat, kalaallinullu inuusuttunut oqaloqateqarnissamik soqutiginninnissaat pingaaruteqartoq isumaqarpunga, Aaja Chemnitz Larsen oqarpoq.
Akerlianik kalaallit inuusuttaat Danmark pillugu ilisimasaqarluartut taassuma erseqqissaatigaa.
Nunatta, Danmarkip Savalimmiullu akornanni suliniut Naalagaaffeqatigiinnerup nukittorsarnissaanik siunertaqarpoq.
Peqatigiiffiit kattuffiillu nunatsinnut attuumassuteqartut Danmarkimi atuartut ornigullutik atuartinneqarsinnaanissaat pillugu suleqataasinnaanissaat periarfissaalluartoq, Aaja Chemnitz Larsen isumaqarpoq. Kattuffiit peqatigiillu assersuutigalugu Sorlak, Inua Rødekorsilu tassani eqqarsaatigineqarput.
- Nunarput pillugu ajornanngitsumik atuartitsinissamut atuartitsissutinik atuartitseriaatsimillu pitsaasunik pilersitsinikkut ilaatigut taamaaliorsinnaavugut. Nunarput pillugu ilisimassarsiornissaq ajornannginnerusariaqarpoq, Aaja Chemnitz Larsen oqarpoq.
Savalimmiormiut partiiannit Sambandflokkurinnimit folketingimut ilaasortap Edmund Joensenip Aaja Chemnitz Larsenillu DUF, tassa Danskit Inuusuttaasa Siunnersuisoqatiigiivi, suleqatigalugit suliniut siunnersuutigaat.
Nunatsinnik ukiorpassuarni ilisimasakippallaarneq imaaliallaannaq allanngortinneqarsinnaanngilaq. Danskillu naalagaaffiat suliniummut tamakkisumik ikiuukkumaartoq, Aaja Chemnitz Larsen neriuppoq.
Nunatsinnimi siunissami namminiilivikkutta nunanik allanik suleqatigilluarneq iluaqutaassasoq, Folketingimut ilaasortaq isumaqarpoq.
Suliniutip ukioq manna januaarip aallaqaataaninngaanniit 2025-mi decembarip ulluisa 25-annut ingerlanneqarnissaa naatsorsuutaavoq.
- Namminiilivissagutta iligisaqarluartariaqarpugut. Ullumimit allaanermik attaveqatigiittoqarsinnaavoq, Aaja Chemnitz Larsen oqarpoq.