Meeqqat atuartut akunnerni 70-ini atuartinneqanngitsut
Klassit arfernganni atuartut ilaasa angajoqqaavata, Birgitte Rothaús Johnsenip, meeqqani atuarfimmi ilikkagaqartarnersoq qularileqqavaa.
- Panima oqarfigaanga ippassigamikkunni kiisami atuarsimallutik. Atuartinneqanngittangaaramik kiisameertertalerluni atuatuaraangamik, Birgitte Rothaús Johnsen oqaluttuarpoq.
Narsami meeqqat atuarfia 170-inik atuartoqarpoq. Ilinniartitsisunut 23-inut atorfeqarluni, taakkunanngali 18-it kisimik innuttaqarlutik. Ilinniartitsisut 18-init saniatigut perorsaasutut ilinniarsimasut sisamat aamma ilinniartitsisunut paarlatsitut sulisartut sisamat atorfeqarput.
Taamaakkaluartorli klassit arfernganni atuartut septembarimi aamma oktobarimi nalunaaquttap-akunnerini 70-ini atuartinneqarsimanngillat.
Taama angajoqqaat naatsorsuisimapput.
- Ajoq. Ukiut tallimat Nuummiikkatta tamakku aqqusaannginnatsigit. Taava maanga pilluni tupannaasalluni. Eqqarsarnartarluni Narsamiilluni atuartuuteqarluni ajoq. Aallaannapajussinnaanatalu, Birgitte Rothaús Johnsen oqaluttuarpoq.
Taamaammat atuartuutitik marluk ilikkagaqartarnersut taassuma qularaa.
- Misiginarpoq soorlu ilikkagaqanngitsoortut, atuanngittangaaramik ilimanarnani ilikkagaqartut, oqarpoq.
Akerliussutsimik takutitsinissaq eqqarsaatigigaat
Narsami meeqqat atuarfianni atuartut angajoqqaavi sapaatip akunnerata uuma aallartinnerani ataatsimiipput. Angajoqqaat 30-t missaanniittut peqataapput, ilaatigut akerliussutsimik takutitsissannginnerlutik eqqartorlugu.
- Pissutsit pissutigalugit atuartut nuannarineq ajoramikkku atuariarnissartik, taava taanna iluarserususullugu atuarfik nuannersuutinniarlugu akerliussutsimik takutitserusuppugut, Birgitte Rothaús Johnsen oqarpoq.
Birgitte Rothaús Johnsenip aamma atuartut angerlartiinnarnagit suliffimmi saniatigut meeqqat atuarfiani nakkutilleeqataasarsinnaanissani periarfissaqarnersoq eqqarsaatersuutigaa.
- Soorunami atuartuuteqarluni atuarfik ajunngitsikkusunnarnermik. Ikiuukkusunnarluni. Qanoq oqaatigisariaanerpoq. Aap, ikiuukkusuppugut, oqarpoq.
Kommune Kujallermi Narsaq kisimi ilinniartitsissussaaleqiffiunngilaq. Qaqortumi Tasersuup Atuarfia ilinniartitsisunik arfineq-pingasunik amigaateqartoq, Nanortalimmi meeqqat atuarfianni ilinniartitsisutut atorfiit qulingiluat inuttaqanngillat.
Narsami meeqqat atuarfiani pisortaagallartup angajoqqaat paasilliuarsinnaanerarpai, taartaaginnaramili isornartorsiutigineqartunut oqaaseqarusunngilaq.