Meeqqat atuarfianni atuartut kodelerineq ilinniassagaat

Naqinnerpassuit, kisitsiserpassuit killiffilersuuterpassuillu qarasaasiami ersertartut imaaginnavittarput.

Nunatsinni meeqqat atuarfiini atuartut tamarmik tamakku ilinniassavaat. Tusassip Coding Classimik atuutsitsilernissaq 2020-mili sulissutigilerpaa, ’iluatsilluarsimavorlu’.

Suliffeqarfik tusagassiuutinut nalunaarummi allappoq.

Tusassip nunatsinni kommunit tallimat suliniutip aallartinneranili suleqatigisimavai, Coding Classilu pillugu nunatsinni tamarmi 90-eriarluni pikkorissaasoqarluni.

Ilinniartitsisut ilinniartitsisinnaaniassagamik sungiusassasut

Atuartullu kodelerinermik ilinniartinneqarsinnaalernissaannut atuarfimmi nammineq kodelerneq ingerlateqqinneqarsinnaalersoq, tusagassiuutinut nalunaarummi allassimavoq.

Kommune Qeqertaliup Tusassillu akornanni suliniut aqqutigalugu tamanna pivoq. Sumiiffimmi tassani ilinniartitsisut kodelerinermik qanoq ilinniartitsisinnaanertik tassani ilinniassavaat.

Monica Lundblad Qeqertarsuup atuarfianeersoq nunatsinni ilinniartitsisuni sungiusarsimasuni siulliuvoq.

- Coding Class ilinniartitsisutut ingerlassinnaalernerani atuartitsissutissamik atuartitsinissamullu isumassarsianik nutaanik sakkussanillu nutaanik pissarsineruvoq annertooq. Atuartunut Coding class ingerlannerani atuartunut killeqanngittumik eqqarsarsinnaanermik isumassarsiorsinnaanermillu periarfissamik annertuumik ammaassivoq, taanna oqarpoq.

- Isumaqarpungalu Coding class ingerlannera periuseq pitsaasuusoq, nunarsuatsinni sukkasuumik ineriartornermut malinnaassagutta meerartatsinnut periarfissanik ammaassissagatta digitalikkullu ineriartorneranut sukkasuumut malinnaatillugit.

Sungiusaasumik nersualaarineq

Monica Lundblad Tusassimit Coding Classimit ilinniartitsinermut siunnersortimit, Nivi Thomassen Olsenimit nersualaarneqarpoq.

- Monica Cortzen Lundbladip pikkorissaannarsimanngilaq; Coding Classili kajumissuseqarluni tikilluaqqusimavaa, kodelerinerullu silarsuaanut nutaaliorfiusumut atuartut ammaannissaannut piareersimalluni. Kajumissuseqarnera nutaaliornissamut nukimik tunisisuuvoq, ilinniartitsisullu Monicatut ittut siunissamut, teknologiimik ilikkagaqarnermillu imalimmut ilusilersuinissamut pingaaruteqarluinnarput, Tusassimi Coding Classimi ilinniartitsinermut siunnersorti Nivi Thomassen Olsen naggasiivoq.

Tusassip atuartut kodelerinermik ilinniartinneqarsinnaanissaat pillugu akisussaaffik Monica Lundbladip Coding Classimi ilinniartitsisinnaalerneratigut atuarfimmut tunniuppaa.