Meeqqanut naalakkersuisoq ullut 100-it qaangiuppata aatsaat apersorneqarumasoq
Meeqqanut, inuusuttunut ilaqutariinnullu naalakkersuisoq, Eqaluk Høegh, KNR-p nutaarsiassaqartitsivianit apersorusullugu arlaleriarluta juunip 22-aniit saaffigisaqattaarparput.
Apersuiniarnermulli ulluni arlalinni saaffiginnissutit tamaasa itigartitsissutigai, naalakkersuisutullu ivertinneqarnerminit ullut 100-it qaangiuppata, tassa aggutsip aallaqqaani aatsaat KNR-p nutaarsiassaqartitsivianit apersorneqarsinnaalissasoq, meeqqanut, inuusuttunut ilaqutariinnullu naalakkersuisoqarfik allakkatigut akissuteqarpoq.
AAMMA ATUARUK Naalakkersuisup allattaatut tunuartoq: Iliuuseqartariaqalerpugut
- Naalakkersuisunik ivertitsinermiit ullut 100-t siulliit qaangiussimalerpata Naalakkersuisoq apersorneqarsinnaalerumaarpoq, naalakkersuisoqarfik allappoq.
Meeqqanut inuusuttunut ilaqutariinnullu naalakkersuisoqarfik allappoq, Naalakkersuisoq ivertinneqarnerminit ullut 100-it qaangiuppata avammut nalunaaruteqarniartoq. Avammut qanoq saqqummiussiniarnera KNR-p soqutigisarinngilaa, naalakkersuisorli apersorusukkaluarlugu.
KNR-p apeqqutingerusutai ilaatigut tassaagaluarput, naalakkersuisoq Inatsisartut ukiaru ataatsimiinnissaannut sunik oqaluuserisassanngortitsinissaminik pilersaaruteqarnersoq, naalakkersuisuusartuniillu siornatigut isornartorsiortakkaminit qanoq allaanerusumik suliniarnersoq.
Eqaluk Høegh naalakkersuisutut ivertinneqaqqammerni nalaani KNR-ip aallakaatitassiaani Nunatta Nipaani ataasiarluni apersorneqarpoq.
AAMMA ATUARUK Meeqqanut naalakkersuisoq uippakajaarnermik eqqugaasoq
Naalakkersuisoqatigiit Inuit Ataqatigiit Nalerarlu isumaqatigiissumminni ilaatigut ima allapput:
- Naalakkersuisoqatigiinnut naalakkersuilluarneq tassaavoq ammasumik paasinartumillu ingerlatsineq. Ammasuuneq innuttaasut toqqissisimanissaannut tatiginninnissaanullu matuersaataavoq, taakkua isumaqatigiissutiminni allapput.
Meeqqanulli, inuusuttunut ilaqutariinnullu naalakkersuisoqarfik maannamut pissarsiarineqarsinnaangilaq.
Naalakkersuisut siulittaasuat, Múte B. Egede Eqaluk Høegh-ip naalakkersuisoqarfia pillugu KNR-mit apersorneqarusunngilaq, Eqaluk Høegh-mullu apersorneqarusunngitsumut innersuussilluni.
Tusagassiortut peqatigiiffiat: Immikkoortitsineruvoq
Naalakkersuisoq Eqaluk Høegh, KNR-mit apersoqqunngilaq, taamaattoq nittartakkatigut nutaarsiassaqartitsivimmit Sermitsiaq.AG-mit pingasoriarluni apersorneqarluni.
Tamanna tusagassiorfinnik immikkortitsinerusoq, Tusagassiuinermik Sulisut Peqatigiiffianni siulittaasoq, Nina-Vivi Møller Andersen isumaqarpoq.
- Isumaqarpunga taamatut tusagassiuutit akornanni immikkoortitsineq, tusagassiuutit aappaanut oqartarluni aappaanullu oqaaseqarusunnani taanna immikkoortitsinerusoq, tamannalu tamat oqartussaaqataanerat eqqarsaatigalugu kusananngilaq.
- Naalakkersuisunngorlaajugaanni pingaaruteqartorujussuuvoq, tusagassiuutitigut ersarissumik saqqummertarnissaq. Saqqummertanngikkaanni tusagassiuutit apeqqusiinerat annertusigaluttuinnartarpoq. Taamaattumik pingaaruteqartorujussuuvoq tusagassiuutit saaffiginnikkaangata Naalakkersuisut erngerlutik akisarnissaat.
AAMMA ATUARUK Eqaluk Høegh: Naalakkersuisoqarfiga naqqaniit pilersinneqassaaq
Nina-Vivi Møller Andersen nammineerluni nittartakkatigut tusagassiorfimmi Sermitsiaq.AG-mi tusagassiortuuvoq. Suleqataasalu naalakkersuisoq Eqaluk Høegh-p apersorniarnera aamma ajornartorsiutigisaraat oqarpoq.
- Isumaqarpunga una naalakkersuisoqarfik nutaaq meeqqanut inuusuttunullu tunngassuteqarmat ammasuunissaq pingaaruteqartoq. Aamma nalunngilara Sermitsiaq.AG-minngaanniit pissarsiariniarneqartarnera ajornakusoortorujussuusoq. Ammanissaq ullut 100-lluunniit tikinngikkaluarlugit taanna pingaaruteqartuaannarpoq.
Tusagassiortut inuiaqatigiit paasissutissanik pajuttorniarlugit sulisarnerminni naalakkersuisunik apersuinissaminnut periarfissaqarnissaat tamat oqartussaaqataanerannut pingaartuusoq siulittaasoq aamma oqarpoq. Apeqqutillu isornartorsiuisut Naalakkersuisut akisinnaasariaqaraat, Nina-Vivi Møller Andersen oqarpoq.
Eqaluk Høegh Inatsisartunut qinersinermi 649-nik qinerneqarpoq.