Naalakkersuisup allattaatut tunuartoq: Iliuuseqartariaqalerpugut
Eqaluk Høegh tusagassiortoq Maasi Pedersen suleqatigalugu Facebookimi videomik ataasinngornermi ullaassakkut saqqummersitsillutik, nunatta politiikerii meeqqanik ajornartorsiortunik ikiuinngippallaarnerarlugit sakkortuumik isornartorsiorpai.
Eqaluk Høeghip naalakkersuisut siulittaasuata allattaatut tunuarnini Facebookikkut suaarutigaa. Tasiilami pisut aallaavigalugit nunatta politiikerii sakkortuumik isornartorsiorpai. Eqaluk Høegh tusagassiortorlu Maasi Pedersen suleqatigiillutik ilaatigut imatut isornartorsiuipput.
DR-ip piviusulersaarutaa "Byen hvor børn forsvinder" Tasiilamut tunngassuteqarpoq.
Tasiilami meeqqat pingasuugaangata ataatsip kinguaassiutitigut atornerlugaasimasarnera meeqqallu marluugaangata ataatsip kommunip isumaginnittoqarfianut suliassanngortinneqarsimanera piviusulersaarummi saqqummiunneqarpoq.
Piviusulersaarutip kingunerisaanik Tasiilami nunattalu sinnerani isumaginninnikkut ajornartorsiutit kingumut oqallissaaqqilerput.
Illuatungiliuttut partiillu tapertaasut Demokraatit aalajangiiffigisassatut siunnersuummik pingasunngormat saqqummiussipput: Naalakkersuisut isumaginninnikkut ikiorneqarnerunissamik Danmarkimut noqqaassuteqarnissaat piumasaqaatigaat. Naalakkersuisullu isumaqataapput, tassalu Naalakkersuisut Danmarkimut isumaginninnikku ikiorneqarnissamik noqqaassuteqarniarput.
- Inuit, pingaartumik meeqqagut sumiginnarneqartut pineqarput. Kisianni aamma pisortanit qinikkanillu sumiginnarneqartarpata nunarput taava sumut atussagatsigu?
Nunatsinni isumaginninnikkut ajornartorsiutit annertuut pillugit Inatsisartuni partiit aamerlanerusut Danmarkimut ikioqqunissamik Naalakkersuisunut piumasaqarput, tamanna arlaleriarluni Isumaginninnermut naalakkersuisup Martha Abelsenip (S) itigartitsissutigereerlugu, Inatsisartuni ippassaq akissuteqarpoq.
Akissuteqaammi Inatsisartut nittartagaatigut saqqummersinneqartumi allappoq siunnersuut Naalakkersuisunit isumaqatigineqartoq. Ima paasillugu: Naalakkersuisut Danmarkimit ikiorneqarnerunissamik noqqaassuteqarniarput.
AAMMA ATUARUK Kim Kielsenip allattaa appisaluussivoq: Facebookikkut soraarniuteqartoq
Eqaluk Høegh isumaqarpoq meeqqat anniartut pillugit massakkut inuiaqatigiit ataatsimoorluta iliuuseqartariaqalersugut:
- Amigaatigiuagarput massakkut pilersittariaqarparput, innuttaasut ataatsimoorluta kivitseqataanissatsinnut ingerlaaqatigiittariaqalerpugut. Qinikkat pisortallu suliaq una artorpaat, taama oqarpoq Naalakkersuisut siulittaasuata allattaa Eqaluk Høegh.
Taassuma politikki qanimut suleqataaffiginerani suut amigaatigineqarnersut nalunngilluarpaa:
- Politikkikkut suliniartarnitsinni pingaarnerpaaq amigaatigiuartaratsigu innuttaasut nipaat, tassa taanna uagut innuttaaqataasutut qaqissinnaasarput. Taamaasiorpugullu.
AAMMA ATUARUK Naalakkersuisut akuersiinnarput: Tasiilami meeqqat pillugit Danmarkimut ikioqqussaagut
Kim Kielsen sammisaq pillugu oqaaseqartinnaraluaratsigu iluatsinngilarput.
