Meeqqanut naalakkersuisoq uippakajaarnermik eqqugaasoq

Inuit Ataqatigiinnit, Eqaluk Høeghip Meeqqanut Ilaqutariinnullu Naalakkersuisunngorneranit qaammatialuinnaat qaangiuttut taanna uippakajaarnermik eqqugaavoq.

Taassuma tamanna Sermitsiaq.ag-mut oqaatigaa. 

- Naalakkersuisoqarfinni piffissami sivitsortumi ulloq kaajallallugu sulisarpunga. Suliffiup angerlarsimaffiullu immikkoortinnissai ajornakusoortissimavakka, imminut peqqissusinnillu eqqaamanninnginnera pissutigalugu uippakajaarnermik eqqugaavunga, taanna tusagassiuutinut oqarpoq.

Taassuma uippakajaarnermut tunngatillugu ilitsersuisumiittarsimanini maannalu ajunnginnerulluni oqaatigaa.

Tamanna inatsiseqarnermut naalakkersuisoqarfiup Naaja Nathanielsenimut (IA) ineqarnermut, attaveqaqatigiinnermut, aatsitassanut naligiissitaanermullu naalakkersuisooreersumut tunniunneqarneranik kinguneqarpoq.

AAMMA ATUARUK Eqaluk Høegh: Naalakkersuisoqarfiga naqqaniit pilersinneqassaaq

Sermitsiaq.ag naapertorlugu Eqaluk Høegh nammineerluni piffissami aalajangersimasumi suliami ilaanik allamut inissinniigallartoqarnissaanik ikioqqusimavoq. Taamaattoqarnerani Meeqqanut Ilaqutariinnullu Naalakkersuisoqarfik taamaallaat naalakkersuisuuffigilerpaa.

Siusinnerusukkut isornartorsiuisarsimanera

Eqaluk Høeghip naalakkersuisunngorami immikkut maluginiarneqarpoq, taassumami siusinnerusukkut siuttuuffissani isornartorsiortarsimavaa.

Naalakkersuisut siulittaasorisimasaanut, Siumumeersumut Kim Kielsenimut 2019-imi maajimi allattaavoq. Taannali Facebookikkut videoliornermigut takuneqarsinnaanngorlugu suliffimminit soraarpoq.

Taassuma qinikkat meeqqanik sumiginnaasorai eqqartuussisutigoortinneqartariaqarsoralugillu, tamannalu soraarneranut pissutaavoq.

KNR-ip Eqaluk Høegh oqaaseqartinniarsimagaluarpaa, sulili iluatsissinnaasimanagu.

Aamma Naalakkersuisut siulittaasuanut Muté Bourup Egedemut (IA) ilanngutassiap matuma saqqummersinnginnerani apersuiniarneq iluatsinngilaq.