Eqaluk Høegh: Naalakkersuisoqarfiga naqqaniit pilersinneqassaaq

Naalakkersuisunut ilaasortat nukarlersaat, Eqaluk Høegh, Inuit Ataqatigiinneersoq siusinnerusukkut isornartorsiungaatsiartagarisimasaminut siuttuussaaq.

Meeqqanut, inuusuttunut, ilaqutariinnut inatsiseqarnermullu naalakkersuisunngortup, Eqaluk Høeghip naalakkersuisutut suliassaqarfini ilungersunarlutillu oqimaassasut nassuerutigaa. Kommunilli ilaatigut ikiuunneratigut meeqqanut inuusuttunullu atugassarititaasut pitsanngorsarnissaannut sulineq ilungersunartoq maanna aallartippoq.

- Kommunit qanimut suleqatiginissaat suleqatiginissaat pingaaruteqarluinnarpoq, aamma naalakkersuinikkut soorunami pingaartilluinnaqqissaarparput.

- Tassami uagut naalakkersuinikkut, ilaana sorpassuit taakkartorsinnaavagut, taamaattorli piviusunngnortitsisussat qanimut peqatiginngikkutsigit anguniakkagut tamakkiisumik angusinnaanngilagut, meeqqanut, inuusuttunut, ilaqutariinnut inatsiseqarnermullu naalakkersuisoq, Eqaluk Høegh oqarpoq.

Taassuma susassaqarfini angisoorujussuusut unammillernartortaqartullu nassuerutigaa.

AAMMA ATUARUK Kim Kielsenip allattaa appisaluussivoq: Facebookikkut soraarniuteqartoq

Eqaluk Høeghip naalakkersuisoqarfini nutaaq naqqanit ilusilersussavaa. Taamaammat pisortat suliniutaat aamma inuinnaat namminneq meeqqallu unammillernartitaat pillugit suliniutaat tusarnaassallugit.

- Ilisimasaq atorlugu una naalakkersuisoqarfik naqqaninngaanniit pilersittariaqaratsigu, Eqaluk Høegh oqarpoq.

Eqaluk Høegh immaqa ilisarisinnaavat.

Eqaluk Høegh Naalakkersuisut siulittaasorisimasaanut, Siumumeersumut Kim Kielsenimut  2019-imi maajimi allattaavoq. Taannali Facebookikkut videoliornermigut ullumikkut 53.000-init amerlanerusunit takuneqarsimasumi suliffimminit soraarpoq.

Taassuma qinikkat meeqqanik sumiginnaasorai eqqartuussutigoortinneqartariaqarsoralugillu, tamannalu soraarneranut pissutaavoq. Taanna meeqqanut inuusuttunullu politikkikkut maanna akisussaasuussaaq.

Naalagaaffiit peqatigiit isumaqatigiissutaat malinneqanngitsut

Nunatsinni meeqqat pisinnaatitaaffii pillugit sullissiviup, MIO-p Naalagaaffiit Peqatigiit isumaqatigiissutaanni Meeqqat pisinnaatitaaffiinut tunngatillugu immikkoortut arlallit nunatsinni malinneqanngitsut siorna ilaatigut erseqqissaatiginikuuaa.

- Oqarnittuut killiffissiuineq ingerlanneqarpoq, taava nalilersuineq tullernguuttussaavoq. Tassani soorunami peqataatitsilluta susassaqartut allallu kivitseqataajumasut peqatigeqqissaarlugit sulinerput ingerlattussaavarput, kisianni aap piffissanngorpoq massakkut sakkortusisamik iliuuseqarnissarput una eqqarsaatigalugu, taamaattumik suliaq aggersoq assorsuaq qilanaarivara, Eqaluk Høegh oqarpoq.

AAMMA ATUARUK Naalakkersuisup allattaatut tunuartoq: Iliuuseqartariaqalerpugut

Taassuma naalakkersuisoqarfiata pisortaata, Julie Præst Wilchep oqarnera naapertorlugu Eqaluk Høeghip parteeqatatalu Mimi Karlsenip naalakkersuisuuffigisaasa sukumiisumik immikkoortinnissaat takujuminaassinnaavoq.

Mimi Karlsen isumaginninnermut naalakkersuisuuvoq, taassumalu pingaarnertut pisortanit ikiorsiissutit ilaatigut siusinaartumik soraarnersiat nalinginnaasumillu inersimasut atugarliortunut isumaginninneq politikkikkut siuttuuffigissavaa. Eqaluk Høeghillu naalakkersuisoqarfiata meeqqanut aamma inunnut innarluutilinnut inatsit malillugu suliamik isumaginninneq inuillu pisinnaatitaaffii ukkatarissallugit.